ابو ظبی۔ 9 اپریل ۔(سیاست ڈاٹ کام) لیبیا کے سابق سربراہ معمر القذافی نے موت سے قبل لاکھوں ڈالر ایسی جگہ چھپائے کہ جس کے بارے میں کسی کو گمان بھی نہیں ہو سکتا۔ مصری جریدے ’’اخبارک ‘‘ نے برطانوی اخبار ٹائمز کے حوالے سے بتایا کہ معمر القذافی نے جنوبی افریقہ کے سابق صدر ’’جیکب زوما ‘‘کی رہائش گاہ پر 30 ملین ڈالر چھپائے تھے۔رپورٹ میں کہا گیا ہے کہ معمر القذافی نے یہ رقم ’’ زوما‘‘کے پاس اکتوبر 2012 میں رکھوائی تھی جس وقت لیبیا میں عوامی بغاوت عروج پر تھی۔اخبار کے مطابق 76 سالہ زوما نے اس رقم کے بارے میں قطعی لاعلمی کا اظہار کرتے ہوئے کہا کہ انھیں نہیں معلوم کے یہ رقم اُن کی رہائش تک کس طرح پہنچی۔قذافی کی موت کے بعد لیبیا کی حکومت نے بیرون ملک سے قومی دولت واپس لانے کی کوشش کا آغاز کیا تاہم حکومت کو وہاں جاری مظاہروں اور انارکی کے باعث کافی مشکلات کا سامنا کرنا پڑا۔ لیبیا نے جنوبی افریقہ کے صدر سیرل راما سے متعدد مرتبہ اس رقم کی واپسی کا مطالبہ بھی کیا مگر اس میں حکومت کو کامیابی نہ مل سکی۔ رپورٹ میں مزید کہا گیا ہے کہ سابق صدر کی نقل و حرکات پر نظر رکھی جاتی رہی اس دوران بشیر صالح نے متعدد بار جنوبی افریقہ کا دورہ کیا۔2013 ء میں جنوبی افریقہ کی حکومت نے اس امر کی یقین دہانی کرائی تھی کہ وہ اقوام متحدہ کے قواعد کے مطابق 5.5 ملین اسٹرلنگ پاؤنڈ لیبیا کو لوٹائے گی۔
