چتوڑگڑھ۔30 ستمبر (سیاست ڈاٹ کام ) کشتی کے پاور ہاؤس کہے جانے والے ہریانہ کی خاتون پہلوانوں نے ٹاٹا موٹرز انڈر -23 قومی کشتی چمپئن شپ میں اپنا دبدبہ ثابت کرتے ہوئے 10 وزن زمروں میں سے سات طلائی تمغہ جیت لئے ۔ہریانہ کی پہلوانوں نے کل سات طلائی اپنے نام کئے جبکہ اتر پردیش، مہاراشٹر اور چنڈی گڑھ کی پہلوانوں کو ایک ایک طلائی ملا۔ گورباڈي انڈور اسٹیڈیم میں کھیلی جا رہی اس چمپئن شپ میں سونے کا تمغہ جیتنے والے تمام 10 کھلاڑیوں کو 12 نومبر سے رومانیہ میں شروع ہو رہی انڈر -23 ورلڈ چمپئن شپ کا ٹکٹ بھی مل گیا۔چمپئن شپ کے دوسرے دن ہریانہ کی پہلوانوں کا دبدبہ دیکھنے کو ملا۔ ان کھلاڑیوں نے نہ صرف سامعین کی توجہ کھینچی بلکہ 10 میں سات طلائی تمغہ اپنے نام کرتے ہوئے 225 پوائنٹس کے ساتھ ٹیم چمپئن شپ پر بھی قبضہ کیا۔ اس کے علاوہ اس ریاست کے پہلوانوں نے ایک چاندی اور دو کانسی کے تمغے اپنے نام کر پوائنٹس ٹیبل میں پہلا مقام حاصل کیا۔دوسرے مقام پر رہنے والی اترپردیش کی ٹیم 158 پوائنٹس کے ساتھ ہریانہ سے کافی پیچھے رہی۔ اتر پردیش کے حصہ میں ایک طلائی تمغہ آیا۔ اس کے علاوہ اس ریاست نے پانچ چاندی اور ایک کانسی کا تمغہ حاصل کیا۔ وہیں پنجاب کے حصے میں ایک طلائی ، دو چاندی اور تین کانسی آئے ۔ اس کارکردگی کی بدولت پنجاب تیسرے مقام پر رہا۔ ہریانہ کی خواتین پہلوانوں کا غلبہ شروع سے ہی دیکھنے کو ملا۔ انکش نے 53 کلو گرام میں دہلی کی انکتا کو 5-3 سے شکست دیتے ہوئے طلائی اپنے نام کر ہریانہ کا کھاتہ کھول دیا۔ اس کے بعد 50 کلو گرام میں یوپی کی دویا تومر نے 5-4 کے اسکور سے ہریانہ کی جیوتی پر کامیابی حاصل کی۔ اس کے بعد ہریانہ کی پنکی نے اتراکھنڈ کی ارچنا کو 55 کلو گرام میں 10-4 سے شکست دی۔ ہریانہ کی انجو 57 کلو گرام کے سیمی فائنل میں شکست کھا گئیں۔ اس وزن زمرے کے فائنل میں چنڈی گڑھ کی نیتو نے یوپی کی اندو تومر کو 10-4 سے شکست دی۔انجلی نے 59 کلو گرام میں اترپردیش کی بھارتی بگھیل کو 6-3 سے شکست دی اور ہریانہ کی جھولی میں ایک اور طلائی تمغہ ڈالا۔ 63 کلو گرام میں ہریانہ کی پوجا نے اپنی ہمنام یوپی کی پوجا تومر کو فائنل میں 6-3 سے شکست دے کر طلائی جیتا۔72 کلو گرام میں ہریانہ کی نینا اور 76 کلو گرام میں اسی ریاست سے پوجا نے اپنی اپنی اپوزیشن کی کھلاڑیوں کو شکست دے کر طلائی تمغہ جیتا۔پروگرام سے الگ لندن اولمپک کے تمغہ یافتہ پہلوان یوگیشور دت نے کہاکہ میں اس بات سے خوش ہوں کہ نیشنل چمپئن شپ مختلف جگہ منعقد کی جا رہی ہے ۔ اس کشتی سے وہ تحریک ملے گی جو اسے چاہئے ۔ اس سے نوجوان کھلاڑیوں کو بھی موقع ملے گا۔
