واشنگٹن۔27 مارچ (سیاست ڈاٹ کام ) پروفیشنل امریکی سابق ریسلر اور ڈبلیو ڈبلیو ای میں اپنا لوہا منوانے والی نکی بیلا نے خود کو عمر رسیدہ قرار دیتے ہوئے ڈبلیو ڈبلیو ای سے سبکدوشی کا اعلان کردیا۔ نکی بیلا ڈبلیو ڈبلیو ای سمیت ٹی وی پر ماڈلنگ بھی کرتی ہیں۔ انہوں نے یہ اعلان ایسے وقت میں کیا ہے جب وہ حال ہی میں یورپ میں ہونے والے ڈبلیو ڈبلیو ای کے ایونٹس میں شرکت کرنے گئی تھیں۔کیلیفورنیا میں پیدا ہونے والی35 سالہ نکی بیلا نے اپنے ٹی وی پروگرام ٹوٹل بیلاز میں ڈبلیو ڈبلیو ای سے سبکدوشی کا اشارہ دیا تھا اورکہا کہ ان کے خیال میں اب وقت آگیا ہے کہ وہ نیاکیریئر شروع کریں۔ نکی بیلا نے تسلیم کیا کہ ڈبلیو ڈبلیو ای کے یورپین ٹور نے انہیں احساس دلایا کہ اب ان میں پہلے جیسی طاقت نہیں رہی۔ نکی بیلا کے مطابق اب وقت آگیا ہے کہ میں ڈبلیو ڈبلیو ای کو چھوڑ کر نئے سفر پر توجہ دیں۔اگرچہ نکی بیلا نے یہ نہیں بتایا کہ ڈبلیو ڈبلیو ای سے سبکدوش کے بعد وہ کس طرح کے کیریئر پر توجہ دیں گی تاہم رپورٹس کے مطابق ریسلنگ اسٹار میک اپ اورگارمنٹس کے کاروبار پر توجہ دینا چاہتی ہیں۔ نکی بیلا نے 2007 میں ڈبلیو ڈبلیو ای کیریئر کا آغاز کیا تھا وہ خواتین کے ڈواز چمپیئن شپ کی 2 مرتبہ فاتح رہی ہیں۔ نکی بیلا نے ریسلنگ کیریئر کا آغاز اپنی جڑواں بہن بری بیلا کے ساتھ شروع کیا اور دونوں نے رنگ میں کئی حریف کو شکست دی، ان کی جوڑی بیلا ٹوئنز کے نام سے مشہور رہی۔
