اسلام آباد۔28 مارچ (سیاست ڈاٹ کام ) وزیراعظم عمران خان نے پاکستان کرکٹ بورڈ کی جانب سے کرکٹ کی بہتری کیلئے پیش کردہ تمام منصوبے مسترد کردئیے اور کہا کہ کسی سسٹم نے بھی پاکستان کرکٹ کو بہتر نہیں کیا۔ وزیراعظم کی زیرصدارت کرکٹ کی بہتری کیلئے اجلاس عمران خان نے پی سی بی کے جانب سے مجوزہ تمام منصوبے مسترد کردئیے۔پاکستان کرکٹ بورڈ نے ملک بھر سے 8 علاقوں پر مشتمل نئے ڈومیسٹک سسٹم کا منصوبہ تیار کیا تھا۔ پی سی بی کے ڈائریکٹر ڈومیسٹک کرکٹ ہارون رشید کی جانب سے تفصیلات شروع کرنے پر وزیراعظم عمران خان نے کہا کہ میں نے 40 سال کرکٹ کھیلی ہے، مجھے کرکٹ پر تفصیلات نہ دیں، کرکٹ ٹھیک کرنی ہے تو مصلحتوں سے باہر آئیں۔ وزیراعظم عمران خان نے کہا کہ کسی سسٹم نے بھی پاکستان کرکٹ کو بہتر نہیں کیا،کھلاڑی صرف غیر معمولی صلاحیت پر آگے آتے ہیں، سسٹم ان کا تعاون نہیں کرتا۔ آسٹریلیا کی طرز پر فرسٹ کلاس کرکٹ کی صرف 6 ٹیمیں بنائیں، پنجاب سے 2 ٹیمیں بنا کر باقی صوبوں سے فی کس ایک ٹیم بنائی جائے۔ عمران خان نے کہا کہ جو سسٹم میں بتا رہا ہوں اس سے پاکستان کا مقابلہ دنیا کی کوئی ٹیم نہیں کر سکتی۔
