دبئی ۔27 مارچ (سیاست ڈاٹ کام ) پاکستان کو آسٹریلیا کے خلاف جاری ونڈے سیریز کے تیسرے میچ سے قبل شعیب ملک تنقید کا نشانہ بن گئے ہیں جبکہ سیریز میں جیت کے امکانات کو روشن رکھنے کے لئے ٹیم کوکامیابی ضروری ہے۔ مشہور کمنٹیٹر رمیز راجا نے آسٹریلیا سے دوسری شکست کے بعد شعیب ملک کو آڑے ہاتھوں لیتے ہوئے کہا کہ ‘بدقسمتی سے کچھ ٹھیک نہیں ہورہا، ماسوائے ٹاس جیتنے کے، نہ رنز لگ رہے ہیں اور وکٹس بھی نہیں مل رہی ہیں۔ رمیز راجا نے کہا کہ مجھے ایسا محسوس ہورہا ہے کہ پاکستان پوری طرح تجربے کے مرحلے میں چلاگیا ہے اور کامیابی یا شکست سے کوئی فرق نہیں پڑ رہا ہے اور اگر میرے کانوں نے صحیح سنا ہے تو کپتان شعیب ملک نے کہہ بھی دیا کہ جیت ہار سے کوئی فرق نہیں پڑے گا اگر ہمارا تجربہ ٹھیک چل رہا ہے۔ مجھے تو یقین نہیں ہوا کیونکہ اگر آپ کو جیتنے یا ہارنے سے فرق نہیں پڑ رہا ہے تو پھر یہ سیریز کیوںکھیل رہے ہیں۔ راجا نے کہا کہ ‘اگر آپ نئے کھلاڑیوں کو یہ نہیں بتائیں گے کہ ان کے 50 اور 100 رنز کوئی معنی نہیں رکھتے جو ٹیم کی جیت کے لئے کردار ادا نہیں کررہے ہیں، تو پھر نئے چمپیئن کیسے پیدا کریں گے۔
