نیویارک۔ یکم ستمبر۔(سیاست ڈاٹ کام) امریکہ کے دو سرکردہ میڈیا اداروں نے ڈونالڈ کی موجودہ کارکردگی کا جائزہ لینے کیلئے سروے کرایا ہے جس میں60 فیصد شہریوں نے صدر ڈونالڈ ٹرمپ کی کارکردگی کو نامنظور کردیا ہے جبکہ نصف کے قریب شہریوں نے ان کے مواخذے کی حمایت کی ہے ۔ ’واشنگٹن پوسٹ‘ اور ’اے بی سی نیوز‘کی جانب سے کیے گئے ایک سروے کے نتائج کے مطابق امریکہ کے 36 فیصد عوام نے ٹرمپ کی صدارتی کارکردگی کو قبول کیا ہے ۔یاد رہے کہ رواں سال اپریل میں ہونے والے ایک سروے میں 40 فیصد شہریوں نے ٹرمپ کی کارکردگی پر اطمینان اور 56 فیصد نے عدم اعتماد کا اظہار کیا تھا۔ٹرمپ کے حوالہ سے حالیہ سروے 26 اگست سے 29 اگست کے دوران ایک ایسے وقت میں کیا گیا تھا جب ٹرمپ کے صدارتی مہم کے سابق چیئرمین پال مینافورٹ کو ٹیکس اور بینک فراڈ میں مجرم قرار دیا گیا تھا اور سابق اٹارنی مائیکل کوہن نے ٹرمپ پر جنسی ہراساں کرنے کا الزام لگانے والی خواتین کو خاموش کرنے کے لیے رقم ادا کرنے کا اعتراف کیا تھا۔سروے میں بالغ رائے دہی کی بنیاد پر ایک ہزار 3 شہریوں سے رائے طلب کی گئی تھی۔اس سروے میں حصہ لینے والے 49 فیصد عوام کا کہنا تھا کہ کانگریس کو ان کے خلاف مواخذہ کرنا چاہیے جبکہ 46 فیصد نے اس بات سے اختلاف کیا۔امریکی شہریوں میں 36 فیصد کو یقین ہے کہ ٹرمپ انتخابی مہم کے دوران روس کے ساتھ ساز باز کرنے کے حوالے سے ہونے والی تفتیش میں خصوصی وکیل رابرٹ میولرز کے کام میں مداخلت کی کوشش کرکے انصاف کی راہ میں حائل ہوئے ہیں جبکہ ٹرمپ نے اس تفتیش کو مسترد کرتے ہوئے سیاسی طورپر نقصان پہنچانے کی کوشش قرار دی تھی۔ایک ہزار 3 بالغ شہریوں کے اس سروے رپورٹ کے نتائج کے مطابق 63 فیصد شرکا نے کہا کہ وہ میولر کی تفتیش کی حمایت کرتے ہیں جبکہ 29 فیصد نے اس کی مخالفت کی۔ سروے میں معاشی صورت حال سے نمٹنے کے لیے ٹرمپ کی ریٹنگ بہتر ہوئی ہے جہاں 45 فیصد عوام نے ان کی معاشی کارکردگی کو قبول اور 45 فیصد نے ہی نامنظور کردیا ہے ۔
