جموں : گوجر بکروال طبقہ کے لوگوں نے یہاں جموں میں گوجر بکر وال دیش تحریک انصاف جموں نامی تنظیم کے بینر تلے احتجاج کیا ۔احتجاج کی قیادت کررہے چودھری نزاکت کٹھانا نے بتایا کہ جموں صوبہ خاص طور سے کٹھوعہ ، سانبہ ، جموں او ردودھم پور کے علاقوں میں مسلمانوں کاقافیہ حیات تنگ کیا جارہا ہے ۔ انہوں نے بتایا کہ کٹھوعہ گاؤں میں آٹھ سالہ معصوم خانہ بدوش بچی کے ساتھ عصمت ریزی او ر قتل کے معاملہ کو دبانے کیلئے مسلمانوں کو تنگ کیا جارہا ہے ۔
اس بچی کو انصاف دلانے کیلئے آواز بلند کرنے والے سماجی کارکن طالب حسین چودھری کے خلاف منصوبہ بند سازش کے تحت جھوٹا مقدمہ درج کیاگیا ۔نیز پولیس تھانہ سانبہ کے علاقہ میں شر پسندوں نے مبینہ طور پر گھس کر طالب حسین کو مارا پیٹا ۔ کھٹانا نے کہا کہ سابقہ وزیر اعلی کی رہائش گاہ پر مرفد شاہ نامی نوجوان کی ہلاکت ، رام بن کے گول گلاب علاقہ میں مال مویشی کا کاروبار کرنے والے شخص کی فوج کی گولی سے ہلاکت جیسے واقعات جموں صوبہ میں مسلمانوں کے عدم تحفظ کاشکار ہیں ۔
انہوں نے کہا کہ خطہ میں فرقہ وارانہ ماحول بنانے کیلئے فرقہ پرست طاقتیں سازشیں کررہی ہیں ۔کٹھانا نے گورنرسے اپیل کی کہ ہم آہنگی او رآپسی بھا ئی چارہ کو قائم رکھنے کیلئے مؤثر اقدامات کریں ۔