لندن۔ 27 مارچ (سیاست ڈاٹ کام) شیر میسور ٹیپو سلطان کے اسلحہ خانے کے کچھ نادر و نایاب ہتھیار بشمول ان کے شخصی استعمال والی چاندی کی تلوار ایک نیلامی میں فروخت ہوئی جن سے 107,000 پاؤنڈس حاصل ہوئے۔ ٹیپو سلطان کی ایک 20 بور کی بندوق جس کے بارے میں کہا جاتا ہے کہ وہ چاندی سے بنی ہوئی تھی، کیلئے زائد از 14 بولیاں لگائی گئیں تاہم آخری بولی 60,000 پاؤنڈس کو قطعیت دیتے ہوئے اسے بولی لگانے والے کے حوالے کردیا گیا۔ دیگر تلواروں کے مقابلے 6 نیلام شدہ تلوار کو دیکھ کر یہ اندازہ بخوبی لگایا جاسکتا ہے کہ اسے ٹیپو سلطان نے انگریزوں کے خلاف گھمسان کی لڑائی میں ضرور استعمال کیا ہوگا کیونکہ اس پر جابجا نشانات ہیں جو اس بات کے غماز ہیں کہ سلطان نے اپنے دفاع کیلئے کبھی اس تلوار کا استعمال کیا ہوگا، جب سرنگاپٹم پر انگریزوں کا قبضہ ہوا تھا اور ٹیپو سلطان بہادری سے مقابلہ کرتے ہوئے شہید ہوئے تھے۔ موت کے بعد بھی وہ دیگر سپاہیوں کے درمیان ہاتھ میں تلوار پکڑے ہوئے تھے۔ انگریز فوج انہیں ڈھونڈتی ہوئی وہاں تک پہنچی تھی اور نعش کو دریافت کرنے کے بعد بھی انگریز سپاہی ٹیپو سلطان کی جانب بڑھنے سے ڈر رہے تھے کہ وہ ایک بار پھر حملہ آور نہ ہوجائیں۔ اس بات سے ٹیپو سلطان کی شجاعت کا علم ہوتا ہے۔ اس طرح ایک دیگر تلوار جس پر سونے کا پانی چڑھایا گیا ہے، 58 بولیوں کے بعد آخری بولی لگانے والے کو 18,500 پاؤنڈس میں فروخت کردی گئی۔
