نئی دہلی’ 29اگست (یو این آئی)وزیر اعظم نریندر مودی یکم ستمبر کو دہلی کے تالکٹورہ اسٹیڈیم سے انڈیاپوسٹ پیمنٹ بینک کا افتتاح کریں گے اور اسی دن ملک بھر میں اس کی 650شاخیں اور 3250سروس سینٹروں(ڈاک گھروں) میں بینکنگ سہولیات ملنی شروع ہوجائیں گی۔ مسٹر مودی کی صدارت میں مرکزی کابینہ کی آج یہاں ہوئی میٹنگ میں آئی پی پی بی کے لئے ٹکنالوجی اور انسانی وسائل کے فروغ کے مد میں 635 کروڑ روپے کی اضافی رقم دینے کی تجویز کو بھی منظوری دی ۔ پہلے اس کے لئے 800 کروڑ روپے منظور کئے گئے تھے جو اب بڑھ کر 1435 کروڑ روپے ہوگئے ہیں۔ وزیر مواصلات منوج سنہا نے اس فیصلے کی اطلاع دیتے ہوئے بتایا کہ اس سال 31دسمبر تک ملک کے تمام ایک لاکھ 55ہزا ر ڈاک گھروں کو سروس سینٹروں کی شکل میں آئی پی پی بی سے جو ڑ دیا جائے گا۔اس کام کو پورا کرنے کی مدت کم کرنے کی وجہ سے 635کروڑ روپے کی اضافی رقم کی ضرورت پڑی جس میں چار سو کروڑ روپے ٹکنالوجی ڈیولپمنٹ کے لئے اور 235کروڑ روپے انسانی وسائل کے فروغ کے لئے دئے جائیں گے ۔ پہلے آئی پی پی بی کا آغاز 21 اگست کو ہونا تھا لیکن سابق وزیر اعظم اٹل بہاری واجپئی کی وفات کی وجہ سے قومی سوگ کے سبب اے ملتوی کردیا گیا تھا۔
قومی یوم کھیل :مودی نے کھیل مداحوں کو دی مبارکباد
نئی دہلی، 29 اگست (سیاست ڈاٹ کام) وزیر اعظم نریندر مودی نے قومی یوم کھیل کے موقع پر بدھ کو کھیل مداحوں کو مبارک باد دی۔ مسٹر مودی نے ٹوئٹ کرکے کہا”تمام کھیل مداحوں کو قومی یوم کھیل کی مبارک باد۔ ہاکی کے جادوگر میجر دھیان چند جی کو ان کی سالگرہ کے موقع پر خراج تحسین۔میں ان لوگوں سے کھیلوں اور فٹنس سے متعلق سرگرمیوں کو ترجیح دینے کی اپیل کرتا ہوں جو صحت مند ہندوستان کی تعمیر میں اہم کردار ادا کرے گا”۔ انہوں نے کہا، "میں ان تمام لوگوں کو سلام کرتا ہوں جنہوں نے مختلف کھیل کے مقابلوں میں ہندوستان کی نمائندگی کی ہے ۔ انہوں نے سخت محنت و مشقت سے کئی سنگ میل قائم کئے ہیں.یہ سال کھیل مداحوں کے لئے خاص رہا کیونکہ ہندوستانی کھلاڑیوں نے ایشیائی کھیل 2018 اور دولت مشترکہ کھیلوں سمیت مختلف ٹورنامنٹوں میں شاندار کارکردگی کامظاہرہ کیا ہے ”۔ خیال رہے ہاکی کے جادوگر میجر دھیان چند کی سالگرہ 29 اگست کو ہر سال قومی کھیل دن کے طور پر منایا جاتا ہے ۔