پیرس ۔ 9 ڈسمبر۔(سیاست ڈاٹ کام) فرانس میں مہنگائی، پٹرول۔ڈیزل اور ٹیکس کے اضافے پر ملک بھرمیں ہونے والے مظاہروں میں پورے ملک سے 76,000 مظاہرین حصہ لے رہے ہیں۔ مقامی میڈیا بی ایف ایم ٹی وی کے مطابق حراست میں لئے گئے مظاہرین کی تعداد 1000 تک پہنچ گئی ہے اور 720 افراد کو گرفتار کیا گیا ہے ۔ ٹی وی چینل نے اس سے پہلے فرانس کی وزارت داخلہ میں خارجہ سکریٹری لورینٹ نونیج کے حوالے سے کہا تھا۔ ان مظاہروں میں ملک بھر میں 31,000 اور راجدھانی پیرس میں 8,000 مظاہرین حصہ لے رہے ہیں۔ فرانس میں 17 نومبر سے ہی عوامی مظاہرے ہو رہے ہیں۔ فرانس میں پرتشدد’’زرد صدری احتجاجی تحریک‘‘ کے چوتھے مرحلے پر صدر عمانویل ماکروں نے پہلی مرتبہ تبصرہ میںکہا ہے کہ ’’میں فرانس میں قانون نافذ کرنے والے تمام اداروں، بالخصوص پولیس، کا کمال درجے کی بہادری اور غیر معمولی پیشہ وارنہ مہارت کے مظاہرے پر ان کا شکریہ ادا کرتا ہوں‘‘۔ ادھر فرانسیسی پولیس نے ملک بھر میں ہونے والے احتجاجی مظاہروں میں گرفتار ہونے والوں کے اعداد وشمار جاری کئے ہیں۔ اب تک 1385 افراد کو حراست میں لیا جا چکا ہے۔فرانسیسی وزیراعظم ایڈورڈ فلپ نے پیلی صدری تحریک کے ملک گیر مظاہروں کے بعد اس کے نمایندوں سے نئے مکالمے کی ضرورت پر زور دیا ہے اور کہا ہیکہ حکومت مہنگے رہن سہن پر ان کی تشویش کو دور کرے گی۔
