نئی دہلی ،9اکتوبر (سیاست ڈاٹ کام) وزیرخارجہ سشماسوراج نے اپنے ماتحت وزیرمملکت ایم جے اکبرپر انکی صحافتی زندگی کے دوران دوخاتون صحافیوں کا جنسی استحصال کئے جانے کے الزامات پر آج خاموشی اختیار کرلی ۔وزارت خارجہ میں ‘انڈیا فارہیومنٹی ‘پہل کے آغاز کے موقع پر پروگرام ختم ہونے کے بعد صحافیوں نے جب سوشل میڈیا میں جاری ،’می ٹو’مہم میں وزیر مملکت برائے امورخارجہ اکبرپر الزامات کے بارے میں پوچھا تو سوراج بغیر کچھ بتائے چلی گئیں ۔بعد میں ذرائع نے بتایا کہ یہ معاملہ اکبر کے وزیرکی حیثیت سے برتاؤسے جڑا نہیں ہے اور نہ اسکا وزارت سے کوئی لینا دینا ہے ۔چونکہ یہ معاملہ پوری طرح سے انفرادی ہے اس لئے سب کو لگتاہے کہ اس بارے میں اکبر ہی کچھ کہہ سکتے ہیں ۔ذرائع کا کہنا ہے کہ اکبر کا بیان آنے کے بعد ہی وزیر خارجہ کچھ بول سکتی ہیں ۔اکبر پر دوخاتون صحافیوں نے جنسی استحصال کا الزام لگایاہے ۔ایک رپورٹ کے مطابق 2017میں ایک خاتون صحافی نے آپ بیتی سنائی تھی ،جس کے مطابق اسکے باس نے اسے ہوٹل کے کمرے میں اسے جاب انٹرویو کے لئے بلایاتھا۔ہاروے ونسٹن آف دی ورلڈ نام سے لکھے پوسٹ میں کہاکہ اکبرنے ہوٹل کے کمرے میں اس کا انٹرویو لیا اور اسے شراب پینے کی پیش کش کی ۔انھوں نے بستر پر اپنے پاس بیٹھنے کوکہا۔پوسٹ میں کہاگیاکہ اکبر فحش فون کالس، مسیج اور تبصرہ کرنے میں ماہر ہیں۔ اکبر نے انکے سامنے ہندی گانے بھی گائے تھے ۔اکبر کئی اخبارات اور رسائل کے مدیر رہ چکے ہیں ۔
