لاہور۔ 8 اگسٹ ۔(سیاست ڈاٹ کام) مسلم لیگ (ن) کے قائد اور سابق وزیر اعظم نوازشریف کے دونوں صاحبزادوں کے نام بلیک لسٹ میں ڈال دیئے گئے۔نیب ذرائع کے مطابق حسن نواز اور حسین نواز کے نام نیب کی درخواست پرپاسپورٹ ڈائریکٹریٹ نے بلیک لسٹ میں ڈالے ہیں اور دونوں کے پاسپورٹ بھی بلاک کر دیئے گئے ہیں۔نیب کے مطابق حسن اور حسین نواز اب اپنا پاکستانی پاسپورٹ استعمال نہیں کر سکیں گے کیونکہ ان کے نام بلیک لسٹ میں ڈال کر پاسپورٹ بلاک کردیئے گئے ہیں۔اسلام آباد کی احتساب عدالت نے نیب ریفرنسز میں بار بار طلب کیے جانے کے باوجود عدم پیشی پر حسن اور حسین نواز کو اشتہاری مجرم قرار دیکر ان کے ناقابل ضمانت وارنٹ گرفتاری جاری کررکھے ہیں جب کہ نیب نے دونوں کو انٹرپول کے ذریعے وطن لانے کا بھی فیصلہ کیا ہے۔
