حیدرآباد میں صبح کے اوقات اچانک بارش، ٹریفک درہم برہم
حیدرآباد26جولائی(سیاست ڈاٹ کام)دونوں تلگو ریاستوں تلنگانہ اور آندھراپردیش میں آج صبح اچانک بارش سے عام زندگی مفلوج ہوگئی ۔ کئی علاقوں میں سڑکوں پر پانی جمع ہوگیا ۔ شہر حیدرآباد کے کوٹھی ‘ عابڈس ‘ دلسکھ نگر ‘ ایل بی نگر ‘ بنجارہ ہلز ‘ فلم نگر ‘ امیر پیٹ ‘ کوکٹ پلی ‘ ہائی ٹیک سٹی ‘ مہدی پٹنم ‘ راجندر نگر ‘ شمس آباد اور دوسرے علاقوں میں بارش ہوئی جس سے اسکول جانے والے طلبہ اور ملازمتوں کیلئے جانے والے افراد کو مشکلات کا سامنا کرنا پڑا ۔ شہر حیدرآباد میں پانچ سنٹی میٹر بارش ریکارڈ کی گئی۔بارش کے سبب کئی مقامات پر بجلی کی سپلائی میں رکاوٹ پیدا ہوگئی تاہم دوپہر کے اوقات میں دھوپ دیکھی گئی ۔ حالیہ چند دنوں کی بارش سے جہاں کسانوں میں مسرت کی لہر دوڑ گئی وہیں زیر زمین آبی سطح میں بھی اضافہ کی اطلاع ملی ہے ۔
