پیرس ۔ 5 اکٹوبر (سیاست ڈاٹ کام) انٹرپول کے صدر مینگ ہونگ وائی فرانس سے واپس اپنے وطن چین پہنچنے پر لاپتہ ہوگئے۔ فرانسیسی پولیس نے ان کی گمشدگی کے بارے میں تحقیقات شروع کردی ہیں۔ 64 سالہ مینگ اپنے بیوی بچوں کے ساتھ فرانس کے شہر لیون میں رہائش پذیر ہیں۔ وہ 29 ستمبر کو چین روانہ ہوئے تھے اور تب سے اب تک ان کا اپنے خاندان والوں سے رابطہ نہیں ہوسکا ہے۔ مینگ، انٹرپول کے منتخب صدر ہیں جبکہ وہ پبلک سیکوریٹی کے بارے میں چین کے نائب وزیر ہیں۔ ماضی میں وہ دہشت گردی کے خلاف کارروائیوں کے سربراہ کی حیثیت سے بھی کام کرچکے ہیں۔ انٹرپول کے صدر کی حیثیت سے ان کی مدت ملازمت 2020ء تک ہے۔ ایمنسٹی انٹرنیشنل اور ہیومن رائٹ واچ نے انٹرپول کی صدارت سنبھالتے ہوئے چینی حکومت کے ساتھ ان کے قریبی رابطوں پر تشویش ظاہر کی تھی۔
