پورٹ او پرنس،7اکتوبر(سیاست ڈاٹ کام) کریبیئن جزائر کے ملک ہیتی میں 5.9 شدت کے زلزلہ سے 11 افراد ہلاک اور متعدد زخمی ہو گئے ۔ عالمی خبر رساں ادارہ کے مطابق ہیتی میں گزشتہ شب زلزلہ کے جھٹکوں سے خوف و ہراس پھیل گیا اور لوگ گھروں سے باہر نکل آئے ۔ لینڈ سلائیڈنگ، چھتیں گرنے اور دیگر واقعات میں 11 افراد ہلاک ہو گئے ہیں۔ ہلاکتوں میں اضافہ کا خدشہ ہے ۔امریکی جیولوجیکل سروے کے مطابق ریکٹر اسکیل پر زلزلہ کی شدت 5.9 ریکارڈ کی گئی ہے ۔ زلزلہ کے جھٹکے کے کچھ ہی دیر بعد دو آفٹر شاکس بھی آئے ۔ اس حوالہ سے ہیتی کی انتظامیہ کو ریڈ الرٹ جاری کردیا گیا تھا۔زلزلے کے جھٹکے ہیتی کے تمام ہی حصوں میں محسوس کیے گئے تاہم سب سے زیادہ تباہی دارالحکومت پورٹ او پرنس میں ہوئی جہاں 5 ہلاکتوں کی اطلاع ہے ۔ اسپتالوں میں ایمرجنسی نافذ کردی گئی ہے اور ریسکیو اداروں نے امدادی کاموں کا آغاز کردیا ہے ۔ہیتی کے شہری دفاع کے آفیسر کا کہنا ہے کہ زلزلہ کے جھٹکے کے بعد دو آفٹر شاکس کا بھی سامنا رہا ہے تاہم امدادی کاموں کو جاری رکھے ہوئے ہیں اور شہریوں کو متاثرہ علاقوں سے محفوظ مقام پر منتقل کیا جا رہا ہے ۔ زخمیوں کو ایمبولینس کے ذریعے قریبی اسپتال میں منتقل کردیا گیا ہے ۔
