دو روزہ بین الاقوامی سمینار ، مفتی اعظم فلسطین و خطیب مسجد اقصیٰ مہمان خصوصی
حیدرآباد ۔ 16 ۔ جون : ( پریس نوٹ ) : شعبہ عربی یونیورسٹی کالج آف سائنس ، سیف آباد عثمانیہ یونیورسٹی کے زیر اہتمام دو روزہ بین الاقوامی سمینار بعنوان ’قومی استحکام اور مذہبی روا داری کے فروغ میں چشتیہ صوفیا کا حصہ ‘ 21 اور 22 جون کو انعقاد عمل میں آرہا ہے ۔ افتتاحی تقریب 21 جون بروز ہفتہ فیاپسی آڈیٹوریم ، ریڈہلز میں 10-30 بجے دن منعقد ہوگی ۔ مفتی اعظم فلسطین و خطیب مسجد اقصیٰ فضیلتہ الشیخ محمد اے ایم حسین بحیثیت مہمان خصوصی شرکت اور سمینار کا افتتاح کریں گے ۔ اس سمینار میں علی گڑھ مسلم یونیورسٹی ، یونیورسٹی آف دہلی ، جامعہ ملیہ اسلامیہ ، برکتہ اللہ یونیورسٹی ( بھوپال ) کالی کٹ یونیورسٹی اور مدراس یونیورسٹی کے ممتاز اساتذہ کے علاوہ مقامی جامعات کے نامور اساتذہ چشتی صوفیا کے علم تفسیر ، حدیث ، فقہ ، عربی زبان و ادب کے فروغ کے علاوہ ان کی قومی یکجہتی اور مذہبی روا داری کے ضمن میں کی گئی خدمات پر اپنے تحقیقی مقالے پیش کریں گے ۔ اس موقع پر بدست مفتی اعظم شعبہ کی جانب سے منعقدہ سمینار ’ شاہ ولی اللہ کی تعلیمات کا عصر حاضر سے تعلق ‘ کے مقالہ جات اور خصوصی شمارہ ( ریسرچ جرنل ) بعنوان ’ عربی زبان و ادب کے فروغ میں حیدرآباد کا حصہ ‘ کے مقالہ جات ( ترتیب کردہ ڈاکٹر سید شجاع الدین عزیز ) کی بشکل کتب اجرائی عمل میں آئے گی ۔ سمینار کی صدارت پروفیسر سید رحمن ، پرنسپال کالج ہذا کریں گے ۔ پروفیسر ایس ستیہ نارائنا وائس چانسلر عثمانیہ یونیورسٹی ، الشیخ عبداللہ عبداللہ معزز رکن پارلیمان فلسطین ، جناب زاہد علی خاں ایڈیٹر روزنامہ سیاست ، جناب سید وقار الدین قادری ایڈیٹر رہنمائے دکن ،پروفیسر محمد مصطفی شریف ڈائرکٹر دائرۃ المعارف العثمانیہ اور پروفیسر اختر الواسع کمشنر برائے اقلیتی لسانیات حکومت ہند مہمانان اعزازی ہوں گے ۔ مولانا ڈاکٹر سید خسرو حسینی سجادہ نشین حضرت خواجہ بندہ نواز کلیدی خطبہ دیں گے ۔ جناب عبدالقادر فیصل ممبر ، مجلس عاملہ عثمانیہ یونیورسٹی خطبہ استقبالیہ پیش کریں گے ۔ پروفیسر ایم سرینواس ہدیہ تشکر پیش کریں گے ۔ ڈاکٹر سید شجاع الدین عزیز سمینار کے کنوینر ہوں گے ۔ تفصیلات کے لیے 9885217655 پر ربط کریں ۔ شرکت کی عام اجازت ہے ۔۔
