لندن ، 13 مارچ (سیاست ڈاٹ کام) وزیراعظم نواز شریف کے مشیر برائے امور خارجہ اور قومی سلامتی سرتاج عزیز کا کہنا ہے کہ حکام کی کوشش ہے کہ مذاکرات کے ذریعے حکومتی عملداری قائم ہو۔ طالبان کے ساتھ مذاکرات کا کوئی ٹائم فریم نہیں دے سکتے۔ یہاں میڈیا سے گفتگو کرتے ہوئے عزیز نے کہا کہ طالبان پاکستانی حکومت کی رٹ کو چیلنج کررہے ہیں۔ حکومت اپنی رٹ قائم کر کے رہے گی، ضرورت ہوئی تو ایکشن بھی ہوگا۔ یورپی یونین یا کسی اور ملک کو طالبان کے حوالے سے کوئی شرط رکھنے کی ضرورت نہیں۔ ہماری اپنی پالیسی بہت واضح اور جامع ہے۔ عزیز نے کہا کہ افغانستان میں امن ہونا چاہئے، افغانستان میں خانہ جنگی نہیں ہونی چاہئے۔ انھوں نے کہا کہ افغانستان کی اقتصادی ترقی کیلئے پاکستان امن اور مفاہمت کے عمل کی مکمل حمایت کرتا ہے۔ انہوں نے کہا ہے کہ پورے خطے میں امن کیلئے افغانستان میں استحکام ضروری ہے۔ انھوں نے کہا کہ پاکستان افغانستان میں امن اور خوشحالی چاہتا ہے کیونکہ افغانستان میں عدم استحکام سے پاکستان کی اندرونی صورتحال متاثر ہوئی ہے۔
