نئی دہلی۔ 18ستمبر(سیاست ڈاٹ کام) حکومت نے مسلح افواج کو جدید ترین ہتھیاروں اور آلات سے لیس کرنے کی سمت میں قدم بڑھاتے ہوئے آج 9100 کروڑ روپے کے دفاعی سودوں کو منظوری دی۔وزیر دفاع نرملاسیتا رمن کی صدارت میں ہوئی دفاعی خریداری کونسل کی میٹنگ میں ملک میں تیار آکاش میزائل سسٹم کی دو ریجمنٹ کی خریداری، ٹی90ٹینک میں پانی میں سانس لینے میں مدد کرنے والے آلات اور گائیڈیڈہتھیاروں کا نظام تیار کرنے کی منظوری دی گئی۔وزارت دفاع کے افسران کے مطابق آکاش میزائل سسٹم ملک سے خریدو زمرے میں ہندوستان ایروڈائنامکس لمیٹیڈ سے خریداجائے گا۔ یہ موجودہ آکاش میزائیلوں کا جدید ایڈیشن ہوگا۔ جدید ترین ٹکنالوجی پر مبنی میزائیل 360ڈگری پر کہیں بھی کسی بھی سمت میں حملہ کرنے کی صلاحیت والا ہوگا۔دفاعی خریداری کونسل نے دفاع کے شعبے میں میک ان انڈیا کو فروغ دینے کے مقصد سے آرمی کے اہم جنگی ٹینک ٹی 90میں استعمال ہونے والے سانس لینے والے آلات کو ملک میں ہی ڈیزائن اور ڈیولپ کرنے کو بھی منظوری دی۔ یہ آلات ڈی آر ڈی او کے ذریعہ ڈیولپ کئے جائیں گے ۔ یہ آلات ہنگامی حالات میں جوانوں کی پانی کے نیچے سانس لینے میں مدد کرتے ہیں۔کونسل نے ٹی90ٹینکوں کے لئے گائیڈیڈ ہتھیاروں کے نظام کا تجربہ کرنے والے آلات کے ڈیزائن اور ڈیولپمنٹ کوبھی منظوری دی ہے ۔ یہ آلات بھی ڈی آر ڈی ا و ہی تیار کرے گا۔ یہ آلات پہلے بیرونی ملکوں سے خریدے جاتے تھے لیکن اب ڈی آر ڈی او انہیں خود ڈیولپ کررہا ہے ۔
