جنیوا، 22جون (سیاست ڈاٹ کام) اقوام متحدہ کمیشن برائے پناہ گزین (یو این ایچ آر سی) نے کہا ہے کہ گذشتہ چند دنوں میں بحیرہ روم پار کرکے یورپ پہنچنے کی کوشش میں تقریباً 220تارکین وطن لیبیا کی ساحلوں پر ہلاک ہوچکے ہیں۔یو این ایچ آر سی کے بیان کے مطابق گذشتہ منگل کو کشتی ڈوبنے سے ایک سو تارکین وطن میں سے صرف پانچ افراد ہی زندہ بچ سکے ۔ اسی دن 130لوگوں کو لے کر جارہی ربر کی ایک کشتی ڈوب گئی جس میں 70 تارکین وطن کی پانی میں ڈوب کر موت ہوگئی۔ بچائے گئے تارکین وطن اور پناہ گزینوں نے بتایا کہ ان کے ساتھ سفر کرنے والے پچاس سے زائد افراد سمندر میں غرقاب ہوگئے۔ ایجنسی نے کہا کہ یو این ایچ آر سی پناہ گزینوں او ر تارکین وطن کی سمندر میں ڈوب کر ہلاک ہونے کے واقعہ پر فکرمند ہے ۔ اس پر فوراً بین الاقوامی کارروائی کی ضرورت ہے تاکہ تمام ضروری اقدام کرکے سمندر میں راحت اور بچاؤ نظام کو مضبوط بنایا جاسکے ۔ اس میں پورے بحرہ روم میں راحت او ربچاؤکاموں میں اہم رول ادا کرنے والے غیر سرکاری تنظیموں ، تجارتی جہازوں اور دیگر شامل ہیں۔
