دہلی ۔ 26 اگست (سیاست ڈاٹ کام) ہندو مہا سبھا کے لیڈر سوامی چکراپانی مہاراج کے کیرالا سیلاب پر دیئے گئے متنازعہ بیان کے بعد ہیکرز پر گروپ کی ویب سائیٹ ہیک کرنے کا الزام لگایا گیا ہے ۔ کہا گیا ہے کہ ہیکرز نے اس ویب سائیٹ پر ایک مخصوص کیرالا بیف کری کی ترکیب بھی اپ لوڈ کردی ہے ۔ اس میں بیف کی تصاویر بھی شامل کی گئی ہیں۔ واضح رہے کہ چند روز قبل سوامی چکراپانی نے کہا تھا کہ ’’کیرالا کے سیلاب میں صرف اُن افراد کی مدد کی جانی چاہئے جو ’بیف‘ نہیں کھاتے‘‘۔ پارٹی کی ویب سائیٹ abhm.org.in پر نظر آیا کہ اسے ہیکرز نے ہیک کرلیا ہے۔ ویب سائیٹ پر چکراپانی کیلئے بھی ایک پیام تھا جس میں لکھا گیا کہ ’’ہم ، لوگوں کے کردار کی بنیاد پر اُن کو عزت دیتے ہیں نہ کہ اُن کے کھانے کی عادتوں پر‘‘۔ ہیکرز گروپ نے سوامی چکراپانی کے متنازعہ بیان کو بھی پوسٹ کیا جس میں انہوں نے کہا تھا کہ گائے (بیف) کا گوشت کھانا گنا ہے۔ سیلاب میں مدد صرف ان کی ہونی چاہئے جو جانوروں کو نہیں مارتے۔
