سنگا پور ۔ 3 ۔ مارچ (سیاست ڈاٹ کام) ایک ہندوستانی نژاد ملایشیائی باشندہ جسے منشیات کی اسمگلنگ میں ملوث پائے جانے کے بعد سزائے موت سنائی گئی تھی لیکن اب ملک میں گزشتہ حال وضع کی گئی نئی قانون سازی کے مطابق دماغی عدم توازن کا شکار ملزم کی سزائے موت کو سزائے عمر قید میں تبدیل کردیا گیا ۔ 31 سالہ ملزم دنیش پلائی راج رتنم کی سزا کو مس یوز آف ڈرگ ایکٹ پر نظر ثانی کے بعد سزائے عمر قید میں تبدیل کردیا گیا جو اپنی نوعیت کا پہلا واقعہ ہے ۔ 2011 ء میں 19.35 گرام ہیروئین اسمگل کرنے کی پاداش میں دنیش کو سزائے موت سنائی گئی تھی جبکہ 2012 ء میں ملزم کی جانب سے سزا میں تخفیف کی ایک درخواست کو بھی عدالت نے مسترد کردیا تھا ۔ البتہ ہائی کورٹ نے نظرثانی شدہ قانون کے مطابق ملزم کو دماغی طور پر غیر صحت مند پایا اور جس وقت اس نے جرم کا ارتکاب کیا تھا اس وقت بھی وہ ذہنی عدم توازن کا شکار تھا ۔ اس کے دماغ کی طبی جانچ کے بعد اس بات کی توثیق ہوگئی۔
