عہدیداروں اور قائدین کو ہدایات، 25 لاکھ افراد کیلئے مؤثر انتظامات، نئی سڑکوں کی تعمیر
حیدرآباد۔/24 اگسٹ، ( سیاست نیوز) چیف منسٹر کے چندر شیکھر راؤ نے آج شہر کے مضافاتی علاقہ کونگرا کلاں کا دورہ کیا اور 2 ستمبر کو جلسہ عام کے انتظامات کا جائزہ لیا۔ چیف منسٹر نے وزراء، ارکان پارلیمنٹ اور پارٹی قائدین کے ہمراہ جلسہ عام کی تیاریوں کا جائزہ لیتے ہوئے عہدیداروں کو ہدایات جاری کیں۔ انہوں نے کہا کہ مختلف اضلاع سے جلسہ عام میں شرکت کیلئے آنے والے افراد کو کوئی دشواری نہیں ہونی چاہیئے۔ جلسہ عام میں 25 لاکھ افراد کی شرکت متوقع ہے۔ جلسہ عام میں 2014 سے 4 برسوں تک حکومت کی کارکردگی رپورٹ پیش کی جائے گی۔ ترقیاتی و فلاحی اسکیمات اور اقدامات کی تفصیلات پر مبنی رپورٹ عوام کے درمیان پیش ہوگی۔ یہی وجہ ہے کہ اس جلسہ کو ترقی سے موسوم کیا گیا ہے۔ دورہ کے موقع پر چیف منسٹر نے پارٹی قائدین اور کمشنر پولیس راچہ کنڈہ مہیش بھگوت سے انتظامات کے بارے میں معلومات حاصل کی۔ کے سی آر نے تجویز پیش کی کہ پارکنگ کی سہولت کے علاوہ عوام کیلئے پینے کے پانی اور ٹائیلٹس کا انتظام کیا جائے ۔ انہوں نے پولیس کو ہدایت دی کہ وہ آؤٹر رنگ روڈ سے آنے والی گاڑیوں پر خصوصی توجہ دیں تاکہ ٹریفک جام سے دشواری پیش نہ آئے۔ چیف منسٹر نے ڈائس، عوامی نمائندوں اور عوام کے لئے بیٹھنے کے انتظامات اور پارکنگ کے مقام کا معائنہ کیا۔ چیف منسٹر نے کہا کہ 25 لاکھ افراد کی شرکت سے متعلق اس جلسہ عام میں انتظامات میں کوئی کوتاہی نہ رہے۔ انہوں نے آؤٹر رنگ روڈ سے جلسہ گاہ تک عوام کی باآسانی رسائی کیلئے نئی سڑکوں کی تعمیر کا مشورہ دیا۔ انہوں نے پارٹی قائدین کو ہدایت دی کہ وہ متعلقہ حکام سے اجازت نامے حاصل کرتے ہوئے پارٹی فنڈ سے سڑکوں کو ترقی دیں۔ کے سی آر نے 2 ستمبر کے جلسہ عام میں اسمبلی اور لوک سبھا کیلئے پارٹی امیدواروں کے ناموں کے اعلان کا فیصلہ کیا ہے۔ چیف منسٹر کے ہمراہ ریاستی وزراء محمد محمود علی،این نرسمہا ریڈی، کے ٹی راما راؤ، سی لکشما ریڈی، پی مہیندر ریڈی، گورنمنٹ وہپ پی راجیشور ریڈی، مشن بھگیرتا کے نائب صدر نشین وی پرشانت ریڈی، ارکان پارلیمنٹ ڈاکٹر کے کیشوراؤ، جے سنتوش کمار، بی سمن، ارکان مقننہ ٹی کرشنا ریڈی، منچی ریڈی کشن ریڈی، کے پربھاکر، ایس راجو، میئر گریٹر حیدرآباد بی رام موہن اور دیگر قائدین اور اعلیٰ عہدیدار موجود تھے۔ جلسہ عام کے مقام تک پہنچنے کیلئے 15 تا 20 چھوٹے راستے تیار کئے جارہے ہیں اور اس پر پارٹی فنڈ سے تعمیرات انجام دی جائیں گی۔
