واشنگٹن۔9اکٹوبر( سیاست ڈاٹ کام )شمالی شام کے علاقے کوبانی پر دہشت گرد عسکریت پسند گروپ اسلامک اسٹیٹ کا قبضہ یقینی نظر آ رہا ہے سی این این نے صدر باراک اوباما کے کئی قریبی سرکردہ عہدیداروںکا نام ظاہر کیے بغیر اْن کے بیانات کا حوالہ دیتے ہوئے یہ بات کہی۔ان دنوں شام اور ترکی کی سرحد پر واقع شہر عین العرب، جسے کْرد زبان میں کوبانی کہتے ہیں، عالمی میڈیا کی توجہ کا مرکز بنا ہوا ہے۔ تازہ ترین اطلاعات کے مطابق جہادی گروپ اسلامک اسٹیٹ نے اس علاقے کے تیسرے شہر کو بھی اپنے کنٹرول میں لے لیا ہے۔ ایسا لگتا ہے کہ امریکی حکومت کے خیال میں کوبانی کو آئی ایس کے قبضے سے بچانا اب مزید ممکن نہیں رہا ہے۔ اگر درحقیقت یہی صورتِ حال ہے تو کیا اس سے واشنگٹن حکومت کی اس علاقے پر فضائی حملوں کی حکمت عملی کی ناکامی کی نشاندہی ہوتی ہے؟
اس بارے میں خود سابق امریکی صدر جمی کارٹر بھی باراک اوباما پر ڈھکی چھپی تنقید کر چْکے ہیں۔امریکی نشریاتی ادارے سی این این نے صدر باراک اوباما کے کئی قریبی سرکردہ اہلکاروں کا نام ظاہر کیے بغیر اْن کے بیانات کا حوالہ دیتے ہوئے کہا ہے کہ شمالی شام کے علاقے کوبانی پر دہشت گرد عسکریت پسند گروپ اسلامک اسٹیٹ کا قبضہ یقینی نظر آ رہا ہے۔ یہاں تک کہ امریکی فوج کے جنرل مارٹن ڈمپسی امریکی ٹیلی ویژن چینل اے بی سی کے ساتھ بات چیت کرتے ہوئے کہہ چْکے ہیں کہ ’انہیں کوبانی کے سقوط کا خطرہ نظر آ رہا ہے ۔ ادھر امریکی وزیر خارجہ جان کیری نے چہارشنبہ کو واضح الفاظ میں کہا تھا:’’کوبانی کا تحفظ امریکی حکمت عملی کا ہدف نہیں ۔
کیری کا مزید کہنا تھا کہ کوبانی کے واقعات کتنے ہی خوفناک کیوں نہ ہوں، امریکہ کا ٹارگٹ آئی ایس کا بنیادی ڈھانچہ اور اْس کے کمانڈوز کے مراکز ہیں۔ امریکا اور اْس کے اتحادیوں کی طرف سے کوبانی پر حالیہ مشترکہ فضائی حملوں میں واضح اضافے کے باوجود اس علاقے میں اسلامک اسٹیٹ کی پیشقدمی مسلسل جاری ہے۔ اخبار واشنگٹن پوسٹ اب تک سخت اور واضح الفاظ میں کہتا رہا ہے کہ ’امریکہ ایک تباہ کْن شکست کے دھانے پر کھڑا ہے‘، ایک ایسی جنگ میں جسے اوباما نے غیر ضروری احتیاط، پابندیوں اور خود کو حد سے زیادہ محدود رکھتے ہوئے شروع کی تھی۔واشنگٹن کے ایک قدامت پسند تھنک ٹینک ہیریٹیج فاؤنڈیشن سے تعلق رکھنے والے امور مشرق وسطیٰ کے ایک ماہر جِم فلپس کا کہنا ہے کہ کوبانی سے متعلق اوباما کی حکمت عملی ناکام ہوتی دکھائی دے رہی ہے تاہم آیا امریکی فضائی حملوں میں تیزی کے بعد اس کے واضح اثرات مرتب ہوں گے
، اس بارے میں حتمی طور پر کچھ کہنا قبل از وقت ہو گا۔ اس کے لیے کچھ انتظار کی ضرورت ہے۔جِم فلپس کو تاہم اس امر کا مکمل ادراک ہے کہ محض امریکی فضائی حملے اسلامک اسٹیٹ کے خلاف جنگ اور اْسے تباہ کرنے کے لیے کافی نہیں ہیں۔ ان کے مطابق، ’زمینی صورتحال کے بارے میں جب تک مکمل آگاہی نہیں ہوتی، تب تک فضائی حملے فیصلہ کْن اثرات مرتب نہیں کر سکتے‘۔عراق کے برعکس شام میں امریکہ اْن بنیادی شرائط کو پورا نہیں کر سکتا، جو اس ملک میں عسکری طور پر کسی کامیاب آپریشن کے لیے ضروری ہیں۔ جِم فلپس کے مطابق:’’شام اسٹرٹیجک اعتبار سے کہیں زیادہ پیچیدہ ملک ہے کیونکہ شام کی سرزمین پر امریکہ کا کوئی حقیقی حلیف موجود نہیں ہے، جو فضائی حملوں کی تیاری اور آپریشن میں معاون اور مدد گار ثابت ہو۔
تنہا زمینی کارروائی کر نے سے ترکی کا انکار
مرست پینا ر 9اکٹوبر( سیاست ڈاٹ کام )ترکی نے کہا ہے کہ وہ شام میں جاری آپریشن کی تنہا قیادت نہیں کر سکتا۔ ترک وزیر خارجہ مَیوْوت چِاوْوشْولَو’نے جمعرات کے روز ایک پریس کانفرنس سے خطاب کرتے ہوئے کہا ہے کہ اْن کے ملک سے اس بات کی توقع نہیں کی جانا چاہیے کہ وہ شامی شہر کوبانے میں اسلامک اسٹیٹ کے شدت پسندوں کے خلاف یک طرفہ زمینی کارروائی کرے گا۔ واضح رہے کہ مغربی ممالک کی جانب سے انقرہ پر دباؤ ہے کہ وہ کوبانے سے اسلام اسٹیٹ کے شدت پسندوں کو پسپا کرنے کے لیے مغربی فضائی کارروائی کو زمینی مدد فراہم کرے۔