کشمیر میں راتیں سرد اور دن گرم ،اقل ترین درجہ حرارت میں اضافہ

کارگل ریاست کا سرد ترین مقام ،سیاحتی مرکز گلمرگ بھی سردی کی لہر کی زد میں
سرینگر 26 جنوری (سیاست ڈاٹ کام ) وادی کشمیر کے بیشتر حصوں میں چمکدار اور دھوپ سے بھر پور صبح کا منظر دیکھا گیا حالانکہ درجہ حرارت رات کے دوران نقطہ انجماد کے آس پاس رہا ۔ جموں و کشمیر کا گرمائی دارالحکومت سری نگر اور وادی کشمیر کے دیگر کئی مقامات میں کل ایک گرم دن محسوس کیا گیا کیونکہ مطلع صاف تھا اور سورج پوری آب و تاب کے ساتھ چمک رہا تھا ۔ محکمہ موسمیات کے ترجمان نے کہا کہ آج بھی حالات جوں کے توں ہیں ۔ موسم میں آئند چند دن تک کسی بڑ ی تبدیلی کا امکان نہیں ہے ۔ اس نے کہا کہ موسم سرد اور خشک رہے گا ۔ راتیں سرد رہیں گی ۔ 40 دن سے سخت سردی محسوس کی جارہی ہے ۔31 ڈسمبر سے ریاست میں سردی کی شدت برقرار ہے ۔ محکمہ موسمیات کے بموجب رات کا درجہ حرارت کل رات سرینگر میں منفی 1.8 درجہ سیلسیس ریکارڈ کیا گیا جبکہ سابق رات یہ منفی 1.6 تھا ، شہرہ آفاق سیاحتی مرکز گلمرگ جو ملک گیر سطح پر بلکہ بیرون ملک بھی فلم سازوں کیلئے پرکشش ہے منفی 7 درجہ سلسیس درجہ حرارت ریکارڈ کیا گیا جو گذشتہ رات منفی 7.6 تھا ۔ پہلگام میں جو امرناتھ یاترا کی پہلی منزل ہے درجہ حرارت منفی 3.6 درجہ رہا ۔ یہ گذشتہ رات 2.2 درجہ سیلسیس تھا ۔ وادی کشمیر کے باب الداخلہ قاضی گنڈ میں اقل ترین درجہ حرارت دو درجہ سیلسیس ریکارڈ کیا گیا جو ایک دن قبل 2.2 تھا ۔ کپواڑہ میں درجہ حرارت منفی 1.1 درجہ سیلسیس تھا کل یہ صفر درجہ سیلسیس تھا ۔ کوکر ناگ میں منفی 1.6 اور کارگل میں جو سرد ترین مقام ہے منفی 14.4 درجہ سیلسیس درجہ حرارت ریکارڈکیاگیا ۔