کراچی، 12 جون (سیاست ڈاٹ کام) بحیرہ عرب میں سمندری طوفان کی وجہ سے ٹھٹھہ اور بدین کے کئی دیہات زیر آب آ گئے ہیں جبکہ سمندر میں طغیانی کے باعث کراچی میں سینڈز پٹ اور پیرا ڈائز پوائنٹ پر قائم کئی ہٹ پانی میں بہہ گئے ہیں۔ طوفان کے باعث تفریحی مقامات سینڈز پٹ اور ہاکس بے پیراڈائز پوائنٹ پر سمندر کا پانی سڑکوں تک پہنچ گیا ہے۔ منوڑہ تک جانے کا واحد زمینی راستہ بھی منقطع ہو گیا ہے اور ریڑھی گوٹھ میں بھی پانی لوگوں کے گھروں میں داخل ہو گیا ہے۔ کمشنر کراچی شعیب صدیقی نے بلدیاتی کنٹونمنٹ اداروں کو ریڈ الرٹ رہنے کی ہدایت کرتے ہوئے کہا کہ ساحل پر فائر برگیڈ کے لائف گارڈز کی موجودگی یقینی بنائی جائے تا کہ کسی بھی ناگہانی صورتحال سے بر وقت نمٹا جا سکے، ساتھ ہی انہوں نے شہریوں سے اپیل کی کہ وہ سمندر میں جانے سے گریز کریں اور سمندر میں مچھلیوں کے شکار کیلئے جانے والی تمام لانچوں کو بھی واپس بلا لیا گیا ہے۔
