منچریال۔/7جنوری، ( این ایس ایس ) وزیر صحت ڈاکٹر ٹی راجیا نے آج کہا کہ حکومت عنقریب ڈاکٹرس کی مخلوعہ جائیدادوں پر تقررات کرے گی۔ انہوں نے ضلع عادل آباد کے منچریال میں منعقدہ ایک پروگرام میں حصہ لیتے ہوئے گورنمنٹ ایریا ہاسپٹل کی ترقی کیلئے ایک کروڑ روپئے کی رقم کا اعلان کیا۔ انہوں نے کہا کہ ملک کی تاریخ میں پہلی مرتبہ چیف منسٹر کے چندر شیکھر راؤ نے ریاست بھر میں دواخانوں کی ترقی کیلئے 2.280 کروڑ روپئے کی رقم کا اعلان کیا ہے۔ انہوں نے عہدیداروں کو ہدایت دی کہ وہ مارچ تک یہ رقم خرچ کردیں تاکہ دواخانوں کی ہئیت پوری طرح تبدیل ہوجائے۔ کے چندر شیکھر راؤ نے تمام ہاسپٹلس کو بین الاقوامی معیار کے مطابق بنانے کی ہدایت دی ہے۔ انہوں نے کہا کہ حکومت کی کوشش یہ ہے کہ سرکاری ہاسپٹلس اور ایریا ہاسپٹلس کو الٹرا ماڈرن آلات، ڈاکٹرس اور اسٹاف سے لیس کیا جائے اور بروقت طبی خدمات کی فراہمی کو یقینی بنایا جائے۔
