واشنگٹن ۔12 مئی ۔(سیاست ڈاٹ کام) امریکی صدر ڈونالڈ ٹرمپ نے چین سے کہا ہے کہ وہ واشنگٹن کے ساتھ تجارتی معاملت کو ابھی طے کر لے بصورت دیگر 2020 ء میں یہ صورت خراب تر ہو سکتی ہے۔ امریکی صدر 2020 ء میں صدارتی الیکشن جیتنے کی صورت میں اپنی دوسری مدت صدارت کا حوالہ دے رہے تھے۔ چین اور امریکہ کے درمیان تجارتی تنازعات پر مذاکراتی سلسلہ گزشتہ برس سے جاری ہے اور ابھی تک کئی معاملات حل طلب ہیں۔ مذاکرات کا تازہ ترین دور جمعہ 10 مئی کو امریکی دارالحکومت واشنگٹن میں مکمل ہوا تھا۔ اب اگلے دورے کیلئے امریکی وفد چینی دارالحکومت بیجنگ جائے گا۔
