حیدآباد۔4اگست ( سیاست نیوز) تلنگانہ کے چیف منسٹر کالوا کنٹلہ چندر شیکھر راؤ نے آج شام حیدرآباد دکن کے تاریخی گولکنڈہ قلعہ کا معائنہ کیا اور یوم آزادی کے موقع پر پریڈ کی سلامی کے علاوہ پرچم کشائی کی تقریب کے انعقاد کے لئے امکانی مقامات کا جائزہ لیا ۔ چیف منسٹر کے ساتھ شہر سے تعلق رکھنے والے وزراء کے علاوہ جی ایچ ایم سی کے میئر محمد ماجد حسین اور سینئر عہدیدار موجود تھے ۔ چیف منسٹر نے قلعہ گولکنڈہ پر تقریباً 45منٹ گزارے ۔ باور کیا جاتا ہے کہ چیف منسٹر نے سرکاری سطح پر یوم آزادی تقاریب کے انعقاد کے لئے موزوں مقام کے طور پر ’فتح رہبرتوپ‘ کی نشاندہی کی ‘ اس مقام کو ’اٹھارہ سیڑھی‘ بھی کہا جاتا ہے ۔ مسٹر چندر شیکھر راؤ نے بعد ازاں نیا قلعہ میں واقعہ مشہور ومعروف ’ہتھیان کا جھاڑ‘ بھی دیکھا ‘ اس موقع پر اُن کی ٹیم بھی موجود تھی ۔
