امیٹھی ۔ 21 ۔ اپریل : ( سیاست ڈاٹ کام ) : علاقہ پیپر پور میں آج ایک آر ٹی سی بس میں اچانک آگ بھڑکنے سے 9 افراد ہلاک اور تقریبا 10 مسافرین زخمی ہوگئے ۔ پولیس سپرنٹنڈنٹ ہیرا لال نے بتایا کہ یہ واقعہ آج صبح اس وقت پیش آیا جب یو پی اسٹیٹ روڈ ویز ٹرانسپورٹ کارپوریشن کی بس فیض آباد سے الہ آباد جارہی تھی کہ موضع رام گاؤں کے قریب آتشزدگی کا شکار ہوگئی ۔ انہوں نے بتایا کہ بس میں 42 مسافرین سوار تھے ۔ وہ کھڑیوں کے شیشے توڑ کر باہر نکل آئے جب کہ یہ بس آگ لگنے کے بعد 100 میٹر تک جاکر رک گئی ۔ ایس پی نے کہا کہ مہلوکین کی نعشیں جھلس جانے کے باعث ناقابل شناخت ہوگئی ہیں اور زخمیوں کو سلطان پور اور پرتاپ گڑھ کے دواخانوں میں شریک کروادیا گیا ہے ۔ انہوں نے یہ شبہ ظاہر کیا کہ بس کے انجن میں شارٹ سرکیوٹ کی وجہ سے آگ بھڑک اٹھی ہوگی تاہم منیجنگ ڈائرکٹر آر ٹی سی مکیش میسرم نے لکھنو میں بتایا کہ آگ لگنے کی دو وجوہات ہوسکتی ہیں ایک شارٹ سرکیوٹ دوسرے ایل پی جی سلینڈر میں لکیج ۔ اور تحقیقات کے بعد ہی اصل وجہ معلوم ہوسکتی ہے ۔ دریں اثناء حکومت اترپردیش مہلوکین کے لواحقین کو فی کس 5 لاکھ روپئے ایکس گریشیا اور شدید زخمیوں کو ایک لاکھ روپئے اور معمولی زخمیوں کو 50 ہزار روپئے امداد کا اعلان کیا ۔ مقامی رکن پارلیمنٹ اور نائب صدر کانگریس راہول گاندھی نے اس حادثہ پر تعزیت کا اظہار کیا اور پارٹی کارکنوں کو ہدایت دی کہ زخمیوں کو ممکنہ امداد فراہم کریں ۔ رکن پارلیمنٹ کے نمائندہ چندرا کانت دوبے نے یہ اطلاع دی اور بتایا کہ راہول گاندھی پارلیمنٹ میں مصروف ہیں اور بہت جلد زخمیوں سے ملاقات کریں گے ۔ منیجنگ ڈائرکٹر آر ٹی سی نے بتایا کہ اس حادثہ کی مجسٹریل تحقیقات کے لیے ضلع مجسٹریٹ امیٹھی مسٹر جگت رام تیواری نے احکامات جاری کردئیے ہیں اور بس کی دیکھ بھال کی ذمہ داری ڈپو مینجر پر عائد ہوتی ہے جس کے پیش نظر ڈپو مینجر فیض آباد سنتوش کمار کو معطل کردیا گیا ۔۔
