حیدرآباد۔ 5 مئی (پریس نوٹ) مرکزی رویت ہلال کمیٹی صدر مجلس علماء دکن کا ماہانہ اجلاس بعض رویت ہلال رمضان المبارک زیرنگرانی مولانا سید محمد قبول بادشاہ قادری الشطاری آج شام حسینی بلڈنگ، معظم جاہی مارکٹ میں منعقد ہوا۔ شہر میں چاند نظر نہیں آیا۔ رویت ہلال کمیٹی گلبرگہ، ورنگل، کرنول، کڑپہ، کھمم، گنٹور، نیلور، ناندیڑ، لکھنؤ، سورت، ادونی سے مطلع کہیں صاف اور کہیں ابر آلود ہونے کی اطلاعات ملیں اور چاند نظر نہیں آیا۔ صدر چینائی کے مطابق وہاں مطلع صاف ہونے کے باوجود چاند نظر نہیں آیا۔ لہذا تحت احکام شرعیہ مرکزی رویت ہلال کمیٹی صدر مجلس علماء دکن اعلان کرتی ہے کہ 6 مئی 2019ء بروز دوشنبہ 30 شعبان ہوگی۔ اس اجلاس میں مولانا سید محمد قبول بادشاہ قادر الشطاری، مولانا مفتی محمد عظیم الدین، مفتی خلیل احمد، مولانا کاظم پاشاہ قادری الموسوی، مولانا سید حسن ابراہیم حسین سجادہ پاشاہ قادری، مولانا سید محمود بادشاہ قادری زرین کلاہ، مولانا سید حامد محمد افتخار پاشاہ قادری، مولانا سید اولیاء حسینی مرتضی پاشاہ قادری اور جناب قاضی سید نوراللہ فاروق عارفی نے شرکت کی۔
شیعہ علما کا بیان
۰۰ سید علی اصغر جعفری کی اطلاع کے مطابق کل ہند شیعہ مجلس علماء و ذاکرین نے اعلان کیا ہے کہ حیدرآباد میں چاند نظر نہیں آیا اور نہ ہی کہیں رویت کی اطلاع ملی لہذا 6 مئی دوشنبہ کو 30 شعبان ہوگی اور 7 مئی سہ شنبہ کو یکم رمضان المبارک ہوگی۔ اس کی تصدیق حسب ذیل علماء کرام نے کی ہے۔ مولانا سید نبی حسن زیدی، مولانا ڈاکٹر سید نثار حسین حیدر آقا، مولانا سید ظفر یاب حیدر، مولانا رضا عباس خاں، مولانا سید جلال حیدر، مولانا عسکری علی خاں اور مولانا جواد عابدی۔