حیدرآباد ۔ /17 اپریل (راست) مرکزی رویت ہلال کمیٹی صدر مجلس علماء دکن کا ماہانہ اجلاس بضمن رویت ہلال ماہ شعبان المعظم 1439ھ زیرنگرانی حضرت مولانا سید محمد قبول بادشاہ قادری الشطاری معتمد صدر مجلس علمادکن آج شام حسینی بلڈنگ معظم جاہی مارکٹ میں منعقد ہوا ۔ شہر میں چاند نظر آگیا ۔ رویت ہلال کمیٹی گلبرگہ شریف ، پونا ، بسواکلیان ، نظام آباد ، ممبئی میں مطلع ابر آلود تھا چاند نظر نہیں آیا ۔ البتہ ورنگل ، کریم نگر ، مکتھل ، کڑپہ ، ناگپور ، چٹگوپہ ، بلہاری ، پالج (گجرات) کے علاوہ خانقاہ مجیبیہ پٹنہ (بہار) اور فرنگی محل (لکھنؤ) میں چاند نظر آنے کی اطلاعات ملیں ۔ بنا بریں تحت احکام شرعیہ مرکزی رویت ہلال کمیٹی صدر مجلس علماء دکن اعلان کرتی ہے کہ بتاریخ /18 اپریل بروز چہارشنبہ یکم شعبان المعظم 1439 ہوگی ۔ اجلاس میں مولانا سید محمد قبول بادشاہ قادری الشطاری مولانا مفتی محمد عظیم الدین ، مولانا سید ابراہیم حسینی سجاد پاشاہ قادری ، مولانا سید محمود بادشاہ قادری زرین کلاہ اور جناب قاضی سید نوراللہ فاروقی عارفی نے شرکت کی ۔
شیعہ علما کا بیان
سید علی اصغر جعفری کی اطلاع کے بموجب کل ہند شیعہ مجلس علماء و ذاکرین نے اعلان کیا شہر حیدرآباد میں چاند نظر آگیا۔ لہذا 18 اپریل 2018 ء چہارشنبہ کو یکم شعبان 1439 ھ ہوگی۔ اس کی تصدیق حسب ذیل علماء نے کی ہے۔ مولانا ڈاکٹر سید نثار حسین حیدر آقا، مولانا رضا عباس خان، مولانا عسکری خان، مولانا سید جواد عابدی۔