حیدرآباد 8 دسمبر ( راست ) مرکزی رویت ہلال کمیٹی صدر مجلس علمادکن کا ماہانہ اجلاس بضمن رویت ہلال ماہ ربیع الثانی 1440 ھ زیر نگرانی مولانا سید محمد قبول بادشاہ قادری الشطاری منعقد ہوا ۔ شہر میں مطلع جزوی ابر آلود تھا چاند نظر نہیں آیا ۔ گلبرگہ رویت ہلال کمیٹی ، بسواکلیان ، کھمم ، محبوب نگر ، ورنگل ، اودگیر ، رائچور ، پونے ، ویلور ، چینائی ، دہلی ، پٹنہ ، بھوپال ، کلکتہ ، الہ آباد ، ناندیڑ ، سورت سے کہیں مطلع ابر آلود ‘ کہیں صاف ہونے کے باوجود چاند نظر نہیں آنے کی اطلاعات ملیں ۔ البتہ ممبئی ، ہاسپیٹ اور جام نگر سے عام رویت کی اطلاعات ملیں ۔ لہذا تحت احکام شرعیہ مرکزی رویت ہلال کمیٹی صدر مجلس علماء دکن بعد توثیق اعلان کرتی ہے 9 دسمبر اتوار یکم ربیع الثانی 1440 ہوگی ۔ اجلاس میں مولانا سید محمد قبول بادشاہ قادری الشطاری ، مولانا مفتی محمد عظیم الدین ، مولانا سید کاظم پاشاہ قادری ، مولاناسید حسن ابراہیم حسینی سجاد پاشاہ قادری ، مولانا سید محمود بادشاہ قادری زرین کلاہ ، مولانا سید حامد محمد افتخار پاشاہ قادری و جناب قاضی سید نور اللہ فاروق عارفی نے شرکت کی ۔
شیعہ علما کا بیان
٭٭جناب سید علی اصغر جعفری کی اطلاع کے مطابق کل ہند شیعہ مجلس علماء و ذاکرین نے اعلان کیا کہ ہندوستان میں چاند نظر آگیا ہے اور رویت ثابت ہوچکی ہے لہذا 9 دسمبر یکشنبہ کو یکم ربیع الثانی 1440 ہوگی ۔ اسکی تصدیق حسب ذیل علماء کرام نے کی ہے ۔ مولانا ڈاکٹر سید نثار حسین حیدر آقا ، مولانا رضا عباس خاں ، مولانا سید جلال حیدر ، مولانا عسکری علی خاں اور مولانا جواد عابدی ۔