حیدرآباد 28 جون (سیاست نیوز) ریاست کے فزیکل ایجوکیشنل ٹریننگ کالجس میں داخلوں کیلئے منعقدہ ’’پی سیٹ
PCET 2014 نتائج کا اعلان کردیا گیا ۔ آچاریہ این جی رنگا یونیورسٹی میں صدر نشین آندھرا پردیش اسٹیٹ کونسل فار ہائیر ایجوکیشن مسٹر وینو گوپال ریڈی نے یہ نتائج جاری کئے ۔ بعدازاں اخباری نمائندوں سے بات چیت کرتے ہوئے مسٹر وینو گوپال ریڈی نے بتایا کہ بی پی ایڈ میں امیدواروں کے نتائج 91.12 فیصد حاصل ہوئے جبکہ اس میں جملہ 8908 امیدواروں کے منجملہ 8562 امیدوار اہل قرار دیئے گئے ۔ انہوں نے بتایا کہ ڈی پی ایڈ میں امیدواروں کے نتائج کا اوسط 97.08 فیصد رہا جبکہ 6874 امیدواروں کے منجملہ 6673 امیدوار اس پی سیٹ 2014 میں اہل قرار دیئے گئے ۔ اخباری نمائندوں کے مختلف سوالات کا جواب دیتے ہوئے صدر نشین نے بتایا کہ پی سیٹ کے بڑے پیمانے پر کامیاب انعقاد عمل میں لانے کیلئے وسیع تر اقدامات کئے گئے تھے۔ انہوں نے مزید کہا کہ کونسلنگ کے شیڈول کو قطعیت نہیں دی گئی ہے تاہم پی سیٹ کونسلنگ شیڈول کا بہت جلد اعلان کیا جائے گا۔
