کراچی۔ 28 اکٹوبر ۔ ( سیاست ڈاٹ کام) سابق صدر جنرل ریٹائرڈ پرویزمشرف کی والدہ دبئی سے کراچی پہنچ گئیں۔ مشرف کی والدہ زریں مشرف پی آئی اے کی فلائٹ پی کے 208 کے ذریعے دبئی سے کراچی پہنچی ہیں۔ذرائع کے مطابق سابق صدر کی والدہ جو وہیل چیئر پر ہیں، اُن کے ہمراہ ضروری طبی آلات اورآکسیجن کٹ بھی ہے۔ مشرف کی والدہ شدید علیل تھیں اور دبئی کے ایک اسپتال میں زیر علاج تھیں۔وہ پرویز مشرف سے ملنا چاہتی تھیں اسی لئے وہ کراچی آئی ہیں۔ پرویز مشرف کے خلاف غداری کے مقدمے سمیت کئی مقدمات ہیں، جن کی وجہ سے ان کا نام حکومت نے ای سی ایل میں ڈال دیا تھا۔ مشرف نے اس دوران درخواست دی تھی کہ ان کی طبیعت خراب ہے، اس لئے انہیں بیرون ملک جانے کی اجازت دی جائے، تاہم یہ درخواست مسترد کردی گئی تھی، جس کے بعد غداری کے مقدمے کی کارروائی کے دوران پرویز مشرف نے کہا تھا کہ وہ دبئی میں اپنی علیل والدہ کی عیادت اور اپنے علاج کیلئے ملک سے باہر جانے کا ارادہ رکھتے ہیں۔اس حوالے سے عدالت نے فیصلے کا اختیار بھی حکومت کو دے دیا تھا، تاہم حکومت نے ان کا نام ای سی ایل سے نکالنے کی بجائے ان کی والدہ کو وطن لانے کیلئے خصوصی طیارہ دینے کی پیشکش کی
