حیدرآباد،27 ؍ مارچ (پریس نوٹ) ممتاز ماہر تعلیم و ریاضی داں پروفیسر ایوب خان کا مولانا آزاد نیشنل اُردو یونیورسٹی میں پرو وائس چانسلر کے عہدہ پر تقرر کیا گیا ہے۔ رجسٹرار کی جانب سے جاری کردہ اعلامیہ کے بموجب انہوں نے آج اپنے عہدہ کا جائزہ لے لیا۔ وہ جامعہ ملیہ اسلامیہ، نئی دہلی میں شعبۂ ریاضی سے وابستہ تھے۔ اس سے قبل انہوں نے دہلی یونیورسٹی میں بھی طویل عرصے تک تدریسی خدمات انجام دیں۔ پروفیسر ایوب خان نے دہلی یونیورسٹی سے ریاضی میں ایم ایس سی اور پی ایچ ڈی کی ہے۔ ان کے تحت 15 اسکالرس نے تاحال ڈاکٹریٹ مکمل کی ہے۔ ان کے 126 تحقیقی مقالے قومی اوربین الاقوامی جرائد میں شائع ہوچکے ہیں اور کئی اہم قومی و بین الاقوامی سمینار و کانفرنس میں انہوں نے کلیدی خطبے دیئے اور سیشنس کی صدارت کی۔ کتاب ’’کیلکولس اینڈ جیومٹری فار فزیکل اینڈ اپلائیڈ فزیکل سائنسس ‘‘ کے وہ شریک مصنف بھی ہیں۔ وہ کئی نامور پیشہ ورانہ سوسائٹیوں کے رکن ہیں۔ ماضی میں وہ ذاکر حسین کالج، دہلی یونیورسٹی میں چیف پراکٹر کے عہدہ پر بھی فائز رہے ہیں
