واشنگٹن ، 28 جنوری (سیاست ڈاٹ کام) امریکی وزیر خارجہ جان کیری نے کہا ہے کہ پاکستان مستقبل کی اقتصادی طاقت بننے کی صلاحیت رکھتا ہے۔ انہوں نے یہ بات واشنگٹن میں پاکستان کے ایک وفد کے ساتھ اسٹریٹیجک ڈائیلاگ کے موقع پر کہی۔ یہاں کل امریکہ اور پاکستان کے درمیان اسٹریٹیجک ڈائیلاگ طویل وقفے کے بعد شروع ہوئے ہیں۔ اس سے قبل ایسی نشست اکتوبر 2010ء میں منعقد کی گئی تھی۔ یہ سلسلہ دونوں ملکوں کے درمیان اعتماد سازی کیلئے شروع کیا گیا تھا۔ تاہم سلسلہ وار بحرانوں کے باعث اس کو نقصان پہنچا۔ ان میں سے ایک بحران پاکستان کی سرزمین پر امریکی فورسز کی جانب سے خفیہ آپریشن کے دوران دہشت گرد گروہ القاعدہ کے سربراہ اسامہ بن لادن کی ہلاکت کے باعث پیدا ہوا تھا۔ پیر کی گفتگو میں کیری نے پاکستان میں اصلاحات کے نفاذ کی حمایت کی اور خواتین اور اقلیتوں کو معاشرے کا سرگرم حصہ بنانے پر زور دیا۔ انہوں نے کہا: ’’امریکہ ،پاکستان کے عوام کے ساتھ مضبوط تعلق چاہتا ہے،
میں زور دے کر کہتا ہوں کہ ہم پاکستان کے عوام کے ساتھ ہیں۔‘‘ کیری نے پاکستانی وزیر اعظم کی اقتصادی اصلاحات کو بھی سراہا۔ انہوں نے کہا: ’’امریکہ کو اس میں کوئی شبہ نہیں کہ وزیر اعظم شریف کی پالیسیاں پاکستان کو مزید خوشحال مستقبل کی راہ پر ڈال دیں گی اور ہم اکیسویں صدی کیلئے پاکستان کو ’اکنامک ٹائیگر‘ بنانے کے ان کے ہدف کی بھرپور حمایت کرتے ہیں۔‘‘ کیری نے یہ بھی کہا کہ خواتین اور اقلیتوں کو پاکستان کے مستقبل کا حصہ بنانے کی ضرورت ہے۔ انہوں نے کہا: ’’ہم اس بات پر پختہ یقین رکھتے ہیں کہ پاکستان عوام کے تنوع کے اعتبار سے بہت مستحکم ہے اور یہ مزید مضبوط بنے گا جب خواتین و مرد مذہب، فرقوں اور جنس کے فرق کے بغیر معاشرے میں پوری طرح اپنا کردار ادا کریں گے۔‘‘ کیری نے یہ بھی تسلیم کیا کہ پاکستان نے انتہاپسندی کے خلاف لڑائی کی بھاری قیمت چکائی ہے۔