اسلام آباد ۔ 9 ڈسمبر۔( سیاست ڈاٹ کام ) فیصل آباد میں پولیو سے بچاؤ کے قطرے پلانے والی ٹیم پر نامعلوم افراد کی فائرنگ میں ایک رضا کار ہلاک ہو گیا ہے۔پولیس نے بتایا کہ یہ واقعہ فیصل آباد کے علاقے پیپلز کالونی نمبر 1 میں آج صبح پیش آیا۔بلال ٹاؤن کے رہائشی محمد سرفراز رحمانیہ ہائی سکول میں استاد تھے اور وہ پولیو سے بچاؤ کے قطرے پلانے والی ٹیم کے ہمراہ جب پیپلز کالونی نمبر 1 میں رحمانیہ مسجد کے قریب پہنچے تو موٹر سائیکل پر سوار دو مسلح افراد نے ان پر فائرنگ کر دی۔نامعلوم مسلح افراد کی فائرنگ سے محمد سرفراز زخمی ہوگئے۔ ان کو فوری اسپتال منتقل کیا گیا جہاں وہ چل بسے۔پولیس کا کہنا ہے کہ فیصل آباد میں پولیو کی ٹیم پر حملے کا یہ پہلا واقعہ ہے۔یاد رہے کہ حکومتِ پنجاب نے پیر سے تین روزہ انسداد پولیو مہم کا آغاز کیا تھا۔ اس مہم میں مجموعی طور پر 35204 موبائل ٹیمیں پانچ سال تک کی عمر کے ایک کروڑ 80 لاکھ بچوں کو پولیو سے بچاؤ کے قطرے پلائیں گی۔حکومتِ پنجاب کے مطابق صوبے کے داخلی اور خارجہ راستوں پر بھی 2200 ٹیمیں تعینات کر دی گئی ہیں۔ یاد رہے کہ دسمبر سنہ 2012 سے اب تک پاکستان میں پولیو کارکنوں پر حملوں میں 65 سے زیادہ رضاکار اور سکیورٹی اہلکار مارے جا چکے ہیں۔
