حیدر آبادسندھ (پاکستان)۔ 7 جولائی (سیاست ڈاٹ کام) پاکستانی حیدر آباد (سندھ) میں پولیس موبائل پر نامعلوم افراد کی فائرنگ سے تین پولیس ملازمین ہلاک جبکہ پولیس ملازم سمیت 2 افراد زخمی ہو گئے۔ ڈی آئی جی حیدر آباد (سندھ) کا کہنا ہے کہ پولیس میں اتنی صلاحیت نہیں کہ دہشت گردوں سے نمٹ سکے۔ فائرنگ کا واقعہ حیدر آباد (سندھ) کے علاقے لطیف آباد نمبر 8 میں پیش آیا جہاں موٹر سائیکلوں پر سوار 6 نامعلوم ملزمین نے پولیس موبائل پر اندھا دھند گولیاں برسا دیں۔ فائرنگ سے 4 اہل کار اور ایک راہ گیر شدید زخمی ہو گیا۔ زخمیوں کو فوری طور پر بھٹائی دواخانہ لے جایا گیا اور بعد میں انہیں سول اسپتال منتقل کر دیا گیا۔ تاہم اس دوران تین ملازمین پولیس زخموں کی تاب نہ لاتے ہوئے چل بسے جبکہ ایک ملازم پولیس اور راہ گیر دواخانہ میں زیر علاج ہیں۔ اس موقع پر ورثا ء نے شدید احتجاج کیا اور میڈیا کو کوریج سے بھی روک دیا۔ دوسری جانب ڈی آئی جی حیدر آباد (سندھ) ریجن ثناء اللہ عباسی نے سیول اسپتال میں میڈیا سے گفتگو کرتے ہوئے کہا کہ پولیس ملازمین کا قتل شمالی وزیرستان آپریشن کا ردعمل ہو سکتا ہے، دہشت گردی کو روکنا صرف پولیس کا کام نہیں۔ وزیر اعلیٰ سندھ سید قائم علی شاہ نے ہلاک پولیس ملازمین کے ورثاء سے تعزیت کرتے ہوئے واقعہ کا نوٹس لیا اور ڈی آئی جی سے رپورٹ طلب کر لی ہے جبکہ ایم کیو ایم رابطہ کمیٹی نے بھی واقعہ کی مذمت کی ہے۔ جاریہ سال حیدر آباد (سندھ) میں دہشت گرد کارروائیوں میں اب تک 12 پولیس ملازمین ہلاک ہو چکے ہیں۔
