کولمبو۔یکم مارچ( سیاست ڈاٹ کام)وزیرخارجہ سشما سوراج جمعہ کے دن کولمبو پہنچیں گی تاکہ وزیراعظم نریندر مودی کے دورہ سری لنکا کی راہ ہموار کی جاسکے ۔ دونوں ممالک کے وزرائے اعظم کی 25سال سے زیادہ مدت کے بعد ایک دوسرے کے ملک کا دورہ کیا گیا ہے ۔ اپنے دو روزہ دورہ میں سشما سوراج وزیراعظم رانیل وکرما سنگھے سے اور وزیرخارجہ منگالا سمراویرا سے بات چیت کریں گی ۔ سنڈے ٹائمز کی خبر کے بموجب توقع ہے کہ وہ صدر سری لنکا مائتری پالا سری سینا سے بھی ملاقات کریں گی ۔ وزیراعظم نریندر مودی 13مارچ کو سری لنکا کا دورہ کرنے والے ہیں ۔ یہ ان کا اولین دورہ سری لنکا ہوگا جس کے دوران وہ جنگ زدہ جافنا اور ٹرینکومالی کا بھی دورہ کریں گے ۔ مودی کا دورہ گذشتہ ماہ سری سینا کے دورہ نئی دہلی کا جوابی خیرسگالی دورہ ہے ۔ صدر سری لنکا کے دورہ ہند کے موقع پر سیول نیوکلیئر معاہدہ طئے پایا تھا ۔ یہ سری سینا کا جنوری میں صدر منتخب ہونے کے بعد پہلا بیرونی دورہ تھا ۔
