واشنگٹن۔ 18جولائی (سیاست ڈاٹ کام) امریکی صدر ڈونالڈ ٹرمپ نے کہا ہے کہ مغربی دفاعی اتحاد ناٹو کمزور ہو چکا تھا، جسے انہوں نے اپنی سیاست سے اب دوبارہ مضبوط بنا دیا ہے ۔ فن لینڈ کے دارالحکومت ہیلسنکی میں روسی ہم منصب ولادیمیر پوٹن کے ساتھ اپنی ملاقات کے ایک روز بعد ٹرمپ نے منگل کو ٹوئٹر پر اپنے ایک پیغام میں کہا کہ ناٹو کو ایک دفاعی اتحاد کے طور پر دوبارہ مضبوط بنانے کا کام صرف انہی کی وجہ سے ممکن ہو سکا۔ ٹرمپ نے پوٹن سے ملاقات اور اس سے قبل دورہ ًبرطانیہ سے بھی پہلے گزشتہ ہفتے بروسیلز میں ناٹو کے ایک مذاکرات میں بھی شرکت کی تھی، جس دوران اس اتحاد کے دفاعی بجٹ سے متعلق کافی اختلافات سامنے آئے تھے ۔ بعد ازاں رکن ممالک کے مابین اس تنظیم کے بجٹ سے متعلق اتفاق رائے ہو گیا تھا۔
