ابوجا ، 23 اپریل (سیاست ڈاٹ کام) افریقی ملک نائجیریا کے شمال مشرقی علاقے سے اغوا کی جانے والی طالبات میں سے 230 ابھی تک لاپتہ ہیں۔ ایک بورڈنگ اسکول سے ان لڑکیوں کو مسلح افراد نے گزشتہ ہفتے اغوا کیا تھا۔ اسکول پرنسپل کے مطابق صرف 43 طالبات واپس پہنچی ہیں۔ اس اسکول پر حملہ کرنے والوں کا تعلق ممکنہ طور پر بوکوحرام سے تھا۔ ان لڑکیوں کو ٹرکوں میں لے جایا گیا اور محض چند طالبات ہی بچ نکلنے میں کامیاب ہوئیں۔ اْسی دن نائجیریا کے دارالحکومت ابوجا کے ایک بس اسٹیشن پر بوکوحرام کی طرف سے کئے جانے والے ایک حملے میں کم از کم 75 افراد ہلاک اور 140 زخمی ہوگئے تھے۔
