واشنگٹن ۔ 5 مئی ۔(سیاست ڈاٹ کام) امریکی ایوانِ نمائندگان نے 717 بلین ڈالر کے نئے سالانہ دفاعی بجٹ کی تفصیلات عام کر دی ہیں۔ 2019 ء کیلئے مختص دفاعی بجٹ پر ایوانِ نمائندگان کی آرمڈ سروسز کمیٹی اگلے ہفتے سے بحث شروع کرے گی اور اُس کے بعد اس کا بقیہ توثیقی عمل مکمل کیا جائے گا۔ اگلے سال کے بجٹ میں روس اور چین کے ساتھ مسابقتی عمل جاری رکھنے کے علاوہ ترکی کو ہتھیاروں کی فروخت عبوری طور پر معطل کرنے کی تجویز بھی پیش کی گئی ہے۔ ترکی کو ہتھیاروں کی فروخت کے معاملے کا تعلق پینٹگان کی جانب سے ایوان میں ترک امریکی تعلقات کی موجودہ نوعیت سے متعلق رپورٹ سے ہے۔
