ایندھن کی بڑھتی قیمتوں، کسانوں کی خودکشیاں، خواتین کیخلاف مظالم پر وزیراعظم خاموش کیوں ہیں: راہول گاندھی
نئی دہلی 10 ستمبر (سیاست ڈاٹ کام) وزیراعظم نریندر مودی کی حکمرانی میں ملک کو تقسیم کیا جارہا ہے، صدر کانگریس راہول گاندھی نے آج یہ الزام عائد کیا اور اعلان کیاکہ متحدہ اپوزیشن بی جے پی کو آئندہ انتخابات میں شکست دے گی۔ یہاں رام لیلا میدان میں مختلف اپوزیشن پارٹیوں کے ساتھ منعقدہ احتجاجی ریالی سے خطاب کرتے ہوئے اُنھوں نے یہ سوال بھی کیاکہ ایندھن کی بڑھتی قیمتوں، رافیل جیٹ معاملت اور دیگر کئی مسائل جیسے کسانوں کی خودکشیاں، خواتین کے خلاف مظالم اور بے روزگاری پر وزیراعظم کیونکر خاموش ہیں۔ وزیراعظم کے خلاف اپنے لفظی حملے کو بڑھاتے ہوئے راہول نے کہاکہ مودی نے 2014 ء میں ملک کے عوام سے وعدے کئے تھے کہ نوجوانوں، کسانوں اور خواتین کو نوکریاں ملیں گی اور اُن کی سلامتی یقینی بنائی جائے گی۔ عوام نے اُن پر یقین کیا اور اُنھیں اپنی حکومت تشکیل دینے میں مدد کی۔ 4 سال گزر گئے عوام کو صاف دکھائی دے رہا ہے کہ کیا ہوا ہے۔ نریندر مودی کہا کرتے ہیں کہ 70 سال میں کچھ نہیں ہوا اور ہم وہ کام چار سال میں کر دکھائیں گے، یہ سچ ہے۔ جو کچھ اُنھوں نے 4 سال میں کیا ہے وہ 70 برسوں میں نہیں ہوا۔ آپ کہیں بھی نظر ڈالیں ایک ہندوستانی دیگر سے لڑرہا ہے۔ آپ کہیں بھی جائیں وہ لوگوں کو منتشر کرتے دکھائی دے رہے ہیں، ایک دوسرے کے مذہب کی اساس پر، ایک دوسرے کے ساتھ فرق کی بنیاد پر اور اِس طرح ہر کوئی ایک دوسرے کے خلاف گتھم گتھا ہے۔ راہول گاندھی جو ایندھن کی قیمتوں کے خلاف بھارت بند کی قیادت کررہے ہیں، اُنھوں نے کیلاش مانسرور یاترا سے واپسی کے بعد پہلی بار عوام میں نظر آئے ہیں۔ وہ راج گھاٹ گئے جہاں اُنھوں نے مہاتما گاندھی کو خراج پیش کیا اور مانسرور جھیل کا مقدس پانی نچھاور کیا۔ پھر دیگر اپوزیشن اور کانگریس قائدین کے ساتھ ملک گیر احتجاج کے حصے کے طور پر رام لیلا میدان پہونچے۔ وہاں پر اُن کے ساتھ سابق وزیراعظم منموہن سنگھ اور سرکردہ اپوزیشن قائدین، نیشنلسٹ کانگریس پارٹی کے شردپوار اور لوک تانترک جنتادل کے شرد یادو شامل ہوگئے۔ یو پی اے چیرپرسن سونیا گاندھی بھی ریالی میں موجود رہیں لیکن اُنھوں نے خطاب نہیں کیا۔ راہول نے کہاکہ تمام اپوزیشن پارٹیاں مشترک پلیٹ فارم پر جمع ہیں جو اپوزیشن اتحاد کا عکاس ہے۔ یکساں نظریہ کے ساتھ ہم بی جے پی کو شکست دیں گے۔ صدر کانگریس نے کہاکہ یہ بدبختی کی بات ہے کہ ملک کے عوام بشمول کسان، نوجوان اور خواتین کے دُکھ کو یہاں موجود اپوزیشن قائدین سمجھنے کی کوشش کررہے ہیں لیکن نریندر مودی نہیں۔ یہی اُن کے اور ہمارے درمیان فرق ہے۔ ہم یہاں سے وعدہ کرتے ہیں کہ ہم مل جل کر کام کرتے ہوئے بی جے پی کو بیدخل کریں گے۔ راہول نے تعجب کیاکہ وزیراعظم پٹرول اور ڈیزل کی قیمتوں، کسانوں کی خودکشیوں اور اُن ریپ کیسوں کے بارے میں خاموش کیوں ہیں جن میں بی جے پی ایم ایل ایز ملوث ہیں ۔ اور رافیل معاملت پر بھی وزیراعظم نے چپی سادھ رکھی ہے۔