ممبئی 24اگست(سیاست ڈاٹ کام)ممبئی میں چند سال کے دوران کثیرمنزلہ عمارتوں میں آگ لگنے کے واقعات میں مسلسل اضافہ ہواہے ‘ دوروزقبل عیدالاضحی کے روز جنوب وسطی ممبئی کے پریل علاقہ میں کرسٹل ٹاور کی 12ویں منزل کی آتشزدگی کے سلسلہ میں پولیس نے بلڈر عبدالرزاق اسماعیل سپاری والا کوگرفتار کیا اور ممبئی کی بھوئیوڑاہ عدالت نے 27اگست تک پولیس تحویل میں دیا ہے‘ اس آتشزدگی میں چار افراد جان سے ہاتھ دھوبیٹھے اور 20زخمی ہوئے تھے ۔بی ایم سی دستاویز سے پتہ چلتا ہے کہ شہر میں تقریباً 55ہزار عمارتوں کورہائشی سرٹیفکٹ(اوسی) جاری نہیں کیاگیا ہے ‘جس کے لیے بلڈر کے ساتھ میونسپل حکام بھی ذمہ دار ہیں ۔بی ایم سی ذرائع کے مطابق ایک اوسی بلڈرکو عمارت کی تعمیر کے بعد دی جاتی ہے ‘جس کے نتیجے میں وہ فلیٹ فروخت کرسکتا ہے .لیکن 2012 سے عمارت کی تعمیر کے بعد سے بلڈر اور بی ایم سی کے درمیان کشیدگی پائی جاتی تھی, حالانکہ بی ایم سی کا دفتر بالکل عمارت کے مقابل پایاجاتا ہے ۔اوسی ملنے کے بعد مکینوں کو پانی اوربجلی کنکشن دیئے جاتے ہیں۔ممبئی تعمیراتی میدان کے ایک ماہر کے مطابق شہر میں زیادہ تر عمارتیں اوسی حاصل کرنے میں ناکام رہ جاتی ہیں کیونکہ یہ بی ایم سی کی شرائط پر عمل نہیں کرتی ہیں۔بی ایم سی ایک افسر نے کہاکہ اگر بلڈر بی ایم سی کے پلان کے مطابق عمارت نہیں تعمیر کرتا ہے اور اس میں گڑبڑکرتا ہے تو اسے اوسی نہیں دی جاتی ہے ۔اس کے باوجود فلیٹ فروخت کرکے اس کا استعمال شروع ہوجائے تو قانونی کارروائی کی جاری ہے ۔
