وارانسی: 27 مئی(سیاست ڈاٹ کام) لوک سبھا انتخابات میں بی جے پی کو واضح اکثریت اور وارانسی سے تاریخی جیت کے بعد اپنے پارلیمانی حلقے کی عوام کا شکریہ ادا کرنے وارانسی پہنچنے والے مودی نے کہاکہ ان کی حکومت ہندوستان کو دنیا کی تیسری معیشت بنانے کیلئے کام کریں گے۔ مودی نے اپنے اعزار میں منعقد استقبالیہ تقریب سے خطاب کرتے ہوئے کہا’’ ہم نے دنیا کی 11 ویں معیشت کے طور پر اپنے سفر کا آغاز کیا اور چھٹے مقام پر پہنچ گئے۔ ہمار ہدف دنیا کی تیسری بڑی معیشت بننے کا ہے جس کے لئے ہم کام کررہے ہیں۔ یو پی میں سال 2014 تا 2019 کے لوک سبھا اور 2017 کے اسمبلی انتخابات میں ملی بی جے پی کی جیت کو ہیٹرک بتاتے ہوئے انہوں نے کہا کہ لوک سبھا کے دواور اسمبلی انتخابات کے نتائج نے سیاسی پنڈتوں کے اعدادوشمار کو غلط ثابت کردیا۔ عوام نے بی جے پی کی’’سب کا ساتھ، سب کا وکاس‘‘ کی سیاست کو سمجھتے ہوئے ووٹ کے ذریعہ سے یہ ثابت کردیا کہ’’سماجی کیمسٹری‘ ‘ کسی بھی قسم کی اٹکل بازی سے اوپر ہوتی ہے۔ اترپردیش اور ملک کے عام آدمی نے سیاستی پنڈتوں کے سبھی اعدادوشمار کو الٹ کر یہ ثابت کردیا کہ ان پڑھ شخص بھی سیاسی پنڈتوں سے زیادہ سیاسی سمجھ رکھتا ہے۔
