نئی دہلی ،13ستمبر (سیاست ڈاٹ کام)پچھلے عام انتخابات میں بی جے پی کے حق میں عوام سے ووٹ دینے کی اپیل کرنے والے یوگا گروبابا رام دیو نے آج کہاکہ ملک کے عوام غریبی ،بے روزگاری اور مہنگائی سے بے حال ہیں او ر بیرونی ممالک سے کالادھن لانے کے لئے سخت قدم نہیں اٹھائے جارہے ہیں ۔بابارام دیونے ‘پتانجلی ‘کے پانچ پروڈکٹس لانچ کرنے کے بعد پریس کانفرنس میں ایک سوال کے جواب میں کہاکہ ملک مہنگائی ،غریبی اور بے روزگاری سے بے حال ہیں ۔مہنگائی کی مصیبت آئی ہوئی ہے اس سے بھگوان گنیش ہی نجات دلاسکتے ہیں ۔اس طرف توجہ دلائے جانے پر کہ پچھلے انتخابات کے دوران انھوں نے ملک کے عوام سے کہاتھا کہ مسٹر مودی کے اقتدارمیں آنے پر پٹرول ،ڈیزل 35،40روپئے لیٹر مل پائیگا جسکی بی جے پی نے بھی حمایت کی تھی ،رام دیو نے کہاکہ ،”میں نے ایسا کہاتھا لیکن حکومت نے پٹرول اور ڈیزل پر سب سے زیادہ ٹیکس لگا رکھاہے ۔ انھوں نے کہاکہ بین الاقوامی بازار میں خام تیل مہنگا ہواہے ۔امید ہے کہ وزیر خزانہ ارون جیٹلی مہنگائی سے نجات دلائیں گے ۔ رام دیونے کہاکہ ملک کے اندر سے کالادھن نکالنے کیلئے کوششیں کی گئی ہیں اور کچھ سخت قدم اٹھائے گئے ہیں لیکن غیر ممالک سے کالادھن واپس لانے کیلئے سخت قدم اٹھانے کی ضرورت ہے ۔لوگ حکومت کی کارروائی سے مطمئن نہیں ہیں ۔غیر ممالک میں کئ لاکھ کروڑ روپئے کالا دھن کی شکل میں ہے ۔
