مظفرپور ۔ 23 جنوری (سیاست ڈاٹ کام) جنتادل یو کے سینئر لیڈر نتیش کمار نے آج الزام عائد کیا کہ عزیز پور میں اتوار کو ہوئے فسادات اور آتشزنی کے واقعات کے پیچھے ’’ایک سازش‘‘ کارفرما ہے۔ اس فساد میں 4 افراد ہلاک ہوئے تھے۔ انہوں نے عوام سے اپیل کی کہ وہ بھائی چارہ سے رہیں۔ نتیش کمار نے عزیز پور فساد متاثرین سے ملاقات کے بعد اخباری نمائندوں سے بات چیت کرتے ہوئے کہا کہ ان فسادات کے پیچھے بڑی سازش کی بو آرہی ہے جس کی تحقیقات کرانی ہوگی۔ نتیش کمار نے ضلع مظفرپور کے سراہا پولیس اسٹیشن کے تحت آنے والے موضع عزیزپور کا دورہ کیا اور اقلیتوں کے تباہ شدہ مکانات کا معائنہ کیا۔ انہوں نے کہا کہ ریاستی حکومت اس واقعہ کی حساسیت سے واقف ہے۔
