مسلمانوں سے معذرت خواہی کا مطالبہ: محمد خلیق الرحمن
حیدرآباد /3 اکتوبر (سیاست نیوز) انڈین نیشنل کانگریس اقلیت ڈپارٹمنٹ کے کوآرڈینیٹر محمد خلیق الرحمن نے پریس کونسل آف انڈیا کے صدر نشین جسٹس مارکنڈے کاٹجو کی جانب سے مسلم پرسنل لاء کی توہین کرنے کی سخت مذمت کرتے ہوئے انھیں اپنے الفاظ سے دست بردار ہونے اور مسلمانوں سے معذرت خواہی کا مطالبہ کیا۔ انھوں نے کہا کہ مسٹر کاٹجو دوسری میعاد کے لئے پریس کونسل آف انڈیا کے صدر نشین بننا چاہتے ہیں، اس لئے وہ آر ایس ایس اور ہندوتوا طاقتوں کی خوشنودی کے لئے مسلم پرسنل لاء کی مخالفت کر رہے ہیں، تاہم مسلمان سب کچھ برداشت کرسکتے ہیں، مگر مسلم پرسنل لاء میں مداخلت ہرگز نہیں برداشت کریں گے۔ انھوں نے کہا کہ بی جے پی کے انتخابی منشور میں یکساں سیول کوڈ شامل تھا، جب کہ چند دن قبل کاٹجو، وزیر اعظم نریندر مودی اور بی جے پی کے سرکردہ قائدان سے ملاقات کرتے ہوئے دوبارہ پریس کونسل کا صدر نشین بنانے کی اپیل کی تھی اور اب وہ ہندوتوا طاقتوں کو خوش کرنے اور عہدہ صدارت پر برقرار رہنے کے لئے مسلم پرسنل لاء کی مخالفت کر رہے ہیں۔ واضح رہے کہ مسٹر کاٹجو نے مسلم پرسنل لاء کو غیر منصفانہ قرار دیا ہے، جہاں خواتین کے ساتھ غلط سلوک کیا جاتا ہے۔ اس کے علاوہ انھوں نے طلاق کے بارے میں بھی زبان درازی کی ہے، جس کی وجہ سے مسلمانوں میں ان کے خلاف غم و غصہ پایا جا رہا ہے۔ مسٹر خلیق الرحمن نے کہا کہ اگر مسٹر کاٹجو نے مسلمانوں سے معذرت خواہی نہیں کی تو مسلمان انھیں کبھی معاف نہیں کریں گے۔
