بھوپال ۔ /22 اپریل (سیاست ڈاٹ کام) مدھیہ پردیش کے دارالحکومت بھوپال میں پولیس نے دہشت گردی کے الزام میں زبیر اور اس کے چھ ساتھیوں کو ہتھیاروں کے ساتھ گرفتار کرنے کا دعویٰ کیا ۔ پولیس سب انسپکٹر جنرل ( ڈی آئی جی) دھرمیندر چودھری کے مطابق ملزمان کو کل رات خفیہ اطلاع پر بڑبئی جوڑبائی کے پاس سے گرفتار کیا گیا ۔ نشاط پونہ تھانہ پولیس کو رات میں تقریباً ایک بجے اطلاع ملی ۔ جس کی بنیاد پر علاقہ سے سات افراد کو پکڑلیا گیا ۔ پولیس نے ان کے قبضے سے چار طمنچے ، 21 کارتوس ، دو مٹر سائیکل ، دھاردار ہتھیار ، نصف درجن سے زیادہ موبائیل فون اور 31 ہزار روپئے نقد برآمد کرنے کا دعویٰ کیا ۔ مسٹر چودھری نے کہا کہ ملزم وہاں کسی واردات کو انجام دینے کے مقصد سے آئے تھے ۔ لیکن بروقت اطلاع مل جانے کی وجہ سے وہ پولیس کے ہتھے چڑھ گئے ۔ گرفتار ملزمان میں زبیر مولانا کے علاوہ محمد وسیم ، محمد دانش ، سید امن ، سلمان ، محسن اور ارباز شامل ہیں ۔ ان تمام کی عمر 20 سے 30 سال کے درمیان بتائی گئی ہے ۔ بتایا جارہا ہے کہ زبیر کے خلاف یہاں کے مختلف تھانہ علاقوں میں چار درجن مقدمات درج ہیں ۔ وہ ضلع بدر بھی رہ چکا ہے ۔ حال ہی میں اس نے لوگوں میں خوف پیدا کرنے کے مقصد سے کلول پارک میں ہوائی فائرنگ بھی کی تھی ۔
