محکمہ پولیس میں مختلف جائیدادوں پر تقررات

ہ 30جون تک آن لائین فارم کا ادخال ضروری، مسلم نوجوانوں میں زبردست جوش و خروش

حیدرآباد۔/27جون، ( سیاست نیوز)تلنگانہ اسٹیٹ لیول پولیس ریکروٹمنٹ بورڈ کے تحت محکمہ پولیس میں کانسٹبلس اور سب انسپکٹر پولیس (سیول، مرد و خواتین ) کی تقریباً 18 ہزار جائیدادوں پر تقررات کیلئے درخواستیں مطلوب ہیں جس کی آخری تاریخ 30جون ہے۔ تاہم امیدواروں سے مسلم دانشوروں نے اپیل کی ہے کہ وہ آخری تاریخ سے کم از کم دو دن پہلے اپنی آن لائین درخواستیں داخل کردیں کیونکہ آخری ایام میں امیدواروں کی کثیر تعداد کی وجہ سے سرور ڈاون ہوسکتے ہیں جس کے سبب یہ سنہری موقع ضائع ہوسکتا ہے۔ درخواست فارم ویب سائیٹ www.tsiprb.in پر دستیاب ہے۔ مسلم دانشوروں نے امیدواروں کو مشورہ دیا کہ وہ کسی تجربہ کار یا پروفیشنل سے یا پھر ای سیوا یا می سیوا کے توسط سے آن لائن درخواست فارم داخل کریں۔ مسلم نوجوانوں سے اپیل کی گئی ہے کہ وہ محکمہ پولیس میں تقررات کے موقع سے فائدہ اٹھائیں۔ محکمہ پولیس میں مسلم نمائندگی ضروری ہے۔ چونکہ تقررات کے لئے اب انٹرویو کا طریقہ برخاست کردیا گیا ہے اس لئے شفافیت زیادہ ہے۔ ائمہ مساجد سے بھی خواہش کی گئی ہے کہ خطبہ جمعہ سے پہلے اعلان بھی کریں اور درخواست داخل کرنے کی نوجوانوں اور ان کے سرپرستوں کو تلقین بھی کریں۔ امیدواروں کی عمر اور فیس سے متعلق تفصیلات ویب سائیٹ www.tsiprb.in پر دستیاب ہیں۔ اقلیتی امیدواروں کے لئے ہوٹل کرسٹل بنجارہ کے تعاون سے مائناریٹی رائیٹس پروٹیکشن کمیٹی اور مائناریٹی اسٹوڈنٹس آرگنائزیشن نے یکم جولائی سے نظام کالج گراؤنڈ پر فری کوچنگ کا اہتمام کیا ہے۔ خواہشمند امیدوار اس سلسلہ میں 25 جون سے کوچ مسٹر علی سے فون نمبر 9010834134 ، 8464080333 پر رابطہ قائم کریں اور فری کوچنگ کیلئے رجسٹریشن کروائیں۔ یہاں یہ بات قابل ذکر ہے کہ فری کوچنگ کے لئے امیدواروں میں زبردست جوش و خروش دیکھا جارہا ہے اور ان میں اضلاع سے تعلق رکھنے والے امیدواروں کی اکثریت ہے۔